د ۲۰۲۶ فوټبال نړیوال جام د ګروپي پړاو له پای ته رسېدو وروسته، فاینل ته د مدعیو لوبډلو احتمالي لارې معلومې شوې؛ داسې لارې چې د ځینو لوبډلو لپاره اسانه او د ځینو نورو لپاره ډېرې سختې ښکاري.
ارجنټاین، چې د لیونل میسي په ځلېدونکي لوبو او د بشپړو نهو امتیازونو په ترلاسه کولو سره یې ګروپي پړاو پای ته رسولی، د یوولس پړاو په سیالیو کې به له کېپ ورډ سره مخامخ شي. که ارجنټاین بل پړاو ته لار ومومي، د اسټرالیا او مصر د لوبې له ګټونکي سره به مخ شي او تر ربع پایلوبې پورې به د نړۍ د دودیزو مدعیو لوبډلو له مخامخېدو لیرې پاتې شي. د سیالیو د جدول له مخې، ارجنټاین ښايي په نیمه پایلوبه کې له برازیل یا انګلستان سره مخ شي.
په مقابل کې، فرانسه سره له دې چې د خپل ګروپ په سر کې ځای خپل کړی او د ګولونو تر ټولو غوره توپیر یې ثبت کړی، د جدول په تر ټولو سختې برخې کې ځای لري. د دیدیه دېشان لوبډله به له سوېډن سره تر لوبې وروسته، احتمالاً د اتم پړاو په سیالیو کې له جرمني سره مخامخ شي او که بریالۍ شي، ښايي په ربع پایلوبه کې له هالنډ سره ولوبېږي.
د فرانسې لاره له دې وروسته هم اسانه نه ده، ځکه په نیمه پایلوبه کې یې د هسپانیا، پرتګال، کرویشیا یا بلجیم سره د مخامخېدو احتمال شته.
برازیل هم له سختې لارې سره مخ دی او د حذفي پړاو په لومړۍ لوبه کې به له جاپان سره مخامخ شي. که برازیل بل پړاو ته لار ومومي، احتمال لري په ربع پایلوبه کې له انګلستان سره ولوبېږي.
د جدول په بل اړخ کې، د هسپانیا او پرتګال احتمالي لوبه د اتم پړاو له مهمو او زړه راښکونکو سیالیو څخه ګڼل کېږي.
