د ملګرو ملتونو اړوند د سمندري چارو نړیوال سازمان اعلان کړی چې د عمان په خلیج کې پر یوې بېړۍ له برید وروسته یې د هرمز تنګي د تخلیې پروګرام په موقت ډول درولی دی.
دغه پروګرام د دې لپاره پیل شوی و چې سلګونه بېړۍ او زرګونه سمندري کارکوونکي له تاوتریخوالي ډکې سیمې څخه په خوندي ډول وباسي.
د سازمان عمومي منشي ارسینیو دومینګز ویلي، هغه بېړۍ چې برید پرې شوی، د دې پروګرام تر چتر لاندې نه وه روانه، خو د سیمې د ټولو بېړیو لپاره د امنیتي تضمینونو د ارزونې په موخه د عملیاتو د موقت ځنډ پرېکړه شوې ده.
نړیوال سمندري سازمان د برید شوې بېړۍ هویت نه دی څرګند کړی، خو د بریتانیا د سمندري سوداګرۍ د عملیاتو ادارې مخکې ویلي وو چې د عمان ساحل ته نږدې پر یوې کانتینربر بېړۍ مشکوک برید شوی دی.
د سمندري امنیت یوې سرچینې ویلي چې ښايي دا برید د یوې بېپیلوټه الوتکې په وسیله ترسره شوی وي، خو تر اوسه یې مسئول په رسمي ډول نه دی پېژندل شوی.
