بکتاش سلطاني، ۲۹ کلن افغان پناهغوښتونکی چې په بریتانیا کې پر دوو ۱۴ کلنو نجونو د جنسي تېري په تور محاکمه کېږي، د چهارشنبې په ورځ په محکمه کې حاضر شو او د ځان پر وړاندې ټول لګېدلي تورونه یې رد کړل.
هغه د ژباړن په مرسته محکمې ته وویل چې د تېر کال د ډسمبر د پېښې پر مهال بشپړ هوښیار نه و او د «نه کنټرولېدونکې خوبولۍ» له امله نه شي ویلای چې په هغه وخت کې څه پېښ شوي دي.
د دوسیې څارنوالانو ویلي چې دواړه ۱۴ کلنې نجونې د الکولي مشروباتو تر څښلو وروسته په نیمه بېهوښه حالت کې وې او متهم له همدې وضعیت څخه په ګټې اخیستنې پر هغوی جنسي تېری او جنسي ځورونه کړې ده.
د تورپاڼې له مخې، بکتاش سلطاني له پېښې مخکې په خپل اپارتمان کې دغو دوو نجونو ته الکولي مشروبات هم ورکړي وو.
سلطاني دغه تورونه رد کړي او ویلي یې دي چې له پېښې شاوخوا درې میاشتې مخکې له یوې نجلۍ سره اشنا شوی و او هغې ځان ۱۸ کلنه معرفي کړی و.
د هغه په وینا، اړیکه یې وروسته د سنیپچټ له لارې دوام وموند او تر پېښې پورې یې ګومان کاوه چې دواړه نجونې ۱۸ یا ۱۹ کلنې دي.
بکتاش سلطاني محکمې ته ویلي چې په ۲۰۲۲ کال کې د طالبانو له واک ته رسېدو وروسته بریتانیا ته پناه یوړه.
هغه ادعا کړې چې له افغانستان څخه تر وتلو مخکې یې اووه کاله د افغانستان په بېلابېلو ولایتونو کې له برېتانوي پوځ سره همکاري کړې وه او همدې موضوع اړ کړی و چې هېواد پرېږدي.
د دې دوسیې قضایي بهیر لا هم دوام لري او تر اوسه محکمې د لګېدلو تورونو په اړه وروستۍ پرېکړه نه ده کړې.
