د قزاقستان رسنیو راپور ورکړی چې د دغه هېواد یو ستر کانکیندنیز شرکت د افغانستان د کروم کانونو د اکتشاف او پراختیا لپاره د عملي فعالیتونو د پیل په درشل کې دی.
د قازبا خبري آژانس د سرطان په دویمه راپور ورکړی چې «اوراسین ریسورسز ګروپ» شرکت افغانستان ته د ننوتلو لپاره دوه انتخابونه ارزوي؛ یا به په مستقیم ډول د کروم یو کان رانیسي او یا به له افغان شریکانو سره ګډه پانګونه وکړي.
د راپور له مخې، د کانونو د همکارۍ موضوع د قزاقستان د لومړي وزیر مرستیال سیریک ژومانګارین او د طالبانو د رئیسالوزرا اقتصادي مرستیال ملا عبدالغني برادر ترمنځ په لیدنه کې هم مطرح شوې ده.
په دې لیدنه کې د افغانستان د صنعتي اکوامارین ډبرو د پروسس لپاره قزاقستان ته د صادراتو په اړه هم خبرې شوې دي. دواړو لورو همدارنګه د ۱۸.۸ میلیون ډالرو په ارزښت د افغانستان د ۳۰ زره ټنه جستو ډبرو د صادراتو لپاره د تفاهملیک د لاسلیک پلان جوړ کړی دی.
د طالبانو د صنعت او سوداګرۍ وزارت مخکې ویلي وو چې په کابل کې د افغانستان او قزاقستان د ګډ اقتصادي فورم پر مهال د دواړو هېوادونو د خصوصي سکټورونو ترمنځ ۲۵ د همکارۍ تفاهملیکونه لاسلیک شوي دي.
سیریک ژومانګارین د کابل د وروستي سفر پر مهال له محمدحسن اخند، سراجالدین حقاني، نورالدین عزیزي او ملا عبدالغني برادر سره هم لیدلي او د اقتصادي او سوداګریزو همکاریو د پراختیا په اړه یې خبرې کړې دي.
سره له دې چې قزاقستان تر اوسه طالبان په رسمیت نه دي پېژندلي، خو د دواړو لورو ترمنځ اقتصادي او سوداګریزې اړیکې په وروستیو کلونو کې پراخې شوې دي.
د افغانستان لپاره د قزاقستان د ولسمشر ځانګړي استازي یرکین توکوموف په دې وروستیو کې ویلي چې د طالبانو نوم د ترهګرو ډلو له لېست څخه ایستل د هغوی د حکومت د رسمیت پېژندنې معنا نه لري او آستانه لا هم د «تعامل پرته له رسمیت پېژندنې» تګلاره تعقیبوي.
اقتصادي شنونکي باور لري چې د افغانستان د کانونو سکټور، د پراخو فلزي او معدني زیرمو له امله، په راتلونکو کلونو کې د بهرنیو پانګونو له مهمو هدفونو څخه پاتې کېدای شي.
