په کابل کې خصوصي تمدن تلویزیون اعلان کړی چې د طالبانو ځواکونو له لوري د دغه رسنۍ پر مرکزي دفتر تر یرغل وروسته یې خپرونې درېدلې دي.
دې شبکې د سې شنبې په ورځ، د سرطان په دویمه نېټه، په خپلې رسمي فېسبوک پاڼه کې لیکلي چې د طالبانو د ځواکونو له ننوتلو وروسته د تمدن تلویزیون نشرات پرې شوي دي.
تمدن تلویزیون تر دې وړاندې د غرمې شاوخوا ۱۲:۲۰ بجې د خپلې ودانۍ پر مرکزي دفتر د طالبانو د ځواکونو د یرغل خبر ورکړی و.
دغه رسنۍ تر اوسه د دې اقدام د علت او یا هم د خپلو کارکوونکو د وضعیت په اړه نور جزییات نه دي خپاره کړي.
تمدن تلویزیون په خپله اعلامیه کې ویلي چې دا پېښه د تاسوعا او عاشورا د ورځو له رارسېدو سره هممهاله شوې ده.
یادې رسنۍ له افغانانو، په ځانګړي ډول له خپلو لیدونکو او د محرم د مراسمو له ګډونوالو غوښتي چې د دې پېښې اړوند پرمختګونه په دقت تعقیب کړي.
تر اوسه د طالبانو چارواکو د تمدن تلویزیون پر دفتر د یرغل او د نشراتو د بندېدو په اړه رسمي دریځ نه دی څرګند کړی.
تمدن تلویزیون د افغانستان له خصوصي رسنیو څخه دی چې په تېرو کلونو کې یې خبري، فرهنګي او مذهبي خپرونې وړاندې کولې.
