د کډوالو نړیوالې ورځې سره هممهاله، په افغانستان کې د بریتانیا او ایټالیا سفارتونو د بېځایه شویو، راستنېدونکو او زیانمنو افغان کورنیو د ملاتړ پر دوام ټینګار کړی دی.
د بریتانیا سفارت د شنبې په ورځ، د جوزا په ۳۰مه، په یوه پیغام کې د افغان کډوالو او مهاجرینو د زغم او مقاومت ستاینه کړې او ویلي یې دي چې د دغه هېواد بشري مرستې به د کډوالۍ نړیوال سازمان له لارې د افغانستان ته د راستنو شویو کورنیو د ملاتړ لپاره دوام ومومي.
سفارت ټینګار کړی چې د ټولنې د تر ټولو زیانمنو قشرونو د ملاتړ په بهیر کې «هېڅوک باید هېر یا شاته پاتې نه شي.»
د ایټالیا سفارت هم په جلا اعلامیه کې د کورنیو بېځایه شویو، راستنېدونکو او کوربه ټولنو د ملاتړ پر خپلې ژمنې ټینګار کړی دی.
دغه سفارت د افغان کډوالو د ژوند د شرایطو د ښه والي او د کوربه ټولنو د ظرفیت د لوړولو لپاره د نړیوالو همکاریو د پراخېدو غوښتنه هم کړې ده.
دا څرګندونې په داسې حال کې کېږي چې د ملګرو ملتونو د بشري مرستو د همغږۍ دفتر ویلي، له ۲۰۲۳ کال راهیسې تر شپږو میلیونو ډېر افغانان له ګاونډیو هېوادونو څخه افغانستان ته راستانه شوي دي.
اوچا خبرداری ورکړی چې ډېری راستنېدونکي هغو سیمو ته تللي چې له وړاندې د فقر، بېکارۍ او اساسي خدماتو ته د محدود لاسرسي له ستونزو سره مخ وې.
نړیوالو بنسټونو په وار وار د افغان کډوالو د پراخې راستنېدنې د بشري پایلو په اړه اندېښنه څرګنده کړې او د افغانستان د خلکو لپاره یې د نړیوال ملاتړ د زیاتېدو غوښتنه کړې ده.
