د پاکستان لومړي وزیر شهباز شریف د کډوالو نړیوالې ورځې په مناسبت اعلان کړی چې د ۲۰۲۳ کال د سپټمبر له میاشتې راهیسې تر ۲.۴ میلیونه ډېر افغان وګړي د پړاوونو په بڼه بېرته افغانستان ته ستانه شوي دي.
هغه په یوه پیغام کې ویلي چې دغه بهیر په منظم ډول او د انساني کرامت په ساتلو ترسره شوی او پاکستان لا هم خپلو بشري ژمنو ته ژمن دی.
شهباز شریف ټینګار کړی چې د کډوالو پر وړاندې د پاکستان چلند د انساني همغږۍ بېلګه ده او نړیواله ټولنه باید د کوربه هېوادونو هڅې په رسمیت وپېژني.
خو د ملګرو ملتونو د کډوالو عالي کمېشنرۍ راپورونه ښيي چې په وروستیو کلونو کې د افغان کډوالو د بېرته ستنېدو یوه لویه برخه د فشارونو، جبري ایستلو او د پاکستان د حکومت د یو اړخیزو پرېکړو له امله رامنځته شوې ده.
نړیوالو سازمانونو څو ځله د افغان کډوالو د پراخې بېرته ستنېدنې د بشري پایلو په اړه خبرداری ورکړی او د پناه غوښتونکو د حقونو د خوندیتوب او د داوطلبانه ستنېدو غوښتنه یې کړې ده.
په وروستیو میاشتو کې له پاکستانه د افغان کډوالو د راستنېدو څپې د افغانستان پر اقتصاد، عامه خدماتو او بنسټیزو زیربناوو اضافي فشارونه زیات کړي دي.
د نیمروز له نظره، د افغان کډوالو د بېرته ستنېدو موضوع یوازې د مهاجرت مسئله نه ده، بلکې د افغانستان د اقتصادي وضعیت، د کار بازار، ټولنیزو خدمتونو او بشري اړتیاوو سره هم مستقیم تړاو لري.
