د ترکیې د ملي استخباراتو ادارې (میت) اعلان کړی چې احمد کازانجي، د داعش د رسنیزو او تبلیغاتي مسئولانو له ډلې یو مهم غړی، په ځانګړي عملیاتو کې نیولی او ترکیې ته یې انتقال کړی دی.
ترکي رسنیو د چهارشنبې په ورځ، د غبرګولي په ۲۷مه، د امنیتي چارواکو له قوله راپور ورکړی چې نوموړی د «ابو عبیده» او «ابو ابراهیم» په مستعارو نومونو هم پېژندل کېده.
د راپورونو له مخې، کازانجي وروسته له هغه د داعش د تبلیغاتي شبکې مهم مسئول شو چې یو بل لوړپوړی رسنیز مسئول ونیول شو او ده د سیمې په کچه د تبلیغاتي فعالیتونو مشري پر غاړه واخیسته.
د ترکیې د استخباراتو اداره وایي چې احمد کازانجي د افغانستان او پاکستان په سرحدي سیمو کې فعالیت کاوه او د داعش خراسان په رسنیز جوړښت کې یې مهم رول درلود.
د استخباراتي موندنو له مخې، نوموړي له ترکیې څخه د افغانستان او پاکستان سرحدي سیمو ته تر سفر وروسته له داعش سره یوځای شوی و او د دې ډلې په روزنیزو کمپونو کې یې پوځي او ایډیولوژیکې زده کړې ترلاسه کړې وې.
ترکي چارواکي ادعا کوي چې کازانجي یوازې د رسنیزو فعالیتونو مسئول نه و، بلکې له ترکیې څخه افغانستان او پاکستان ته د داعش د غړو د لېږد او تنظیم په چارو کې یې هم ونډه لرله.
د ترکیې دولتي خبري اژانس اناتولي راپور ورکړی چې نوموړی په پاکستان کې د داعش پر مرکزونو د هوايي بریدونو څخه ژوندی پاتې شوی و او غوښتل یې په غیرقانوني ډول ترکیې ته داخل شي څو خپل فعالیتونه بیا پیل کړي.
د راپور له مخې، کازانجي د پلټنو پر مهال له اوزګور آلتون سره د اړیکو اعتراف کړی او د داعش په تبلیغاتي او رسنیزو فعالیتونو کې یې خپل رول هم تأیید کړی دی.
اوزګور آلتون، چې د داعش د رسنیزو فعالیتونو پخوانی مسئول بلل کېږي، تېر کال د افغانستان او پاکستان په سرحدي سیمو کې نیول شوی و. ترکي چارواکو هغه د اروپا او منځنۍ اسیا څخه افغانستان او پاکستان ته د داعش د غړو د انتقال په تور تورن کړی و.
داعش خراسان په وروستیو کلونو کې د داعش له فعالو څانګو څخه ګڼل کېږي او د افغانستان، پاکستان او د سیمې په نورو هېوادونو کې یې د ګڼو خونړیو بریدونو مسئولیت منلی دی.
د نیمروز له نظره، د داعش د رسنیزو او جلبوجذب شبکو پر ضد دا ډول عملیات د ترهګرو ډلو د نفوذ د کمولو لپاره مهم ګڼل کېږي، ځکه دا شبکې د غړو د جذب، تبلیغاتو او سازماني همغږۍ اساسي وسیلې بلل کېږي.
