کیلیان امباپه، د فرانسې د ملي فوټبال لوبډلې لوبډلمشر، د سینیګال پر وړاندې په ځلېدونکي عملکرد سره د خپل هېواد د فوټبال په تاریخ کې د تر ټولو ډېر ګولوهوونکي لوبغاړي لقب خپل کړ.
امباپه د ۲۰۲۶ نړیوال جام په لومړۍ لوبه کې دوه ځله د سینیګال دروازه خلاصه کړه او د فرانسې د ملي لوبډلې د ګولونو تاریخي ریکارډ یې مات کړ.
هغه لومړی د لوبې په ۶۶مه دقیقه کې ګول وکړ او د خپلو ملي ګولونو شمېر یې ۵۷ ته ورساوه؛ هغه شمېر چې مخکې د اولیویه ژیرو په نوم ثبت و.
د فرانسې ستوري وروسته د لوبې په اضافي وخت کې یو بل ګول هم وواهه او د ۵۸م ملي ګول په ثبتولو سره د فرانسې د تاریخ د ګولوهوونکو د جدول په سر کې یوازې پاتې شو.
امباپه، چې د فرانسې د لوبډلمشر بازوبند هم پر مټ لري، دا ریکارډ په ۲۷ کلنۍ کې خپل کړی او لا هم کافي وخت لري چې له نورو تاریخي ګولوهوونکو سره خپله فاصله نوره هم زیاته کړي.
اولیویه ژیرو، د فرانسې پخوانی بریدګر، تر دې وړاندې د ۵۷ ګولونو په لرلو د «خروسونو» د تاریخ تر ټولو غوره ګولوهوونکی و.
د امباپه دوامدارې ځلا په وروستیو کلونو کې هغه د فرانسوي فوټبال له تر ټولو بریالیو لوبغاړو څخه ګرځولی دی. نوموړی نه یوازې د نړیوال جام ۲۰۲۶ د ستورو له ډلې ګڼل کېږي، بلکې ډېری شنونکي یې د انفرادي او ډلهییزو لویو افتخاراتو یو مهم نوماند هم بولي.
فرانسې د سینیګال پر وړاندې د بریا په ترلاسه کولو سره نړیوال جام په ځواکمن ډول پیل کړ، خو د لوبې تر ټولو مهمه کیسه د امباپه تاریخي ریکارډ و؛ ریکارډ چې ښيي د فرانسوي فوټبال نوی عصر لا هم د هغه تر مشرۍ لاندې روان دی.
د نیمروز له نظره، د امباپه لاسته راوړنه یوازې د یو ریکارډ ماتول نه دي؛ بلکې د هغه نسل د بشپړې واکمنۍ نښه ده چې فرانسه یې د نړۍ د فوټبال له سترو قدرتونو څخه ساتلې ده. که نوموړی په همدې کچه دوام وکړي، ښايي په راتلونکو کلونو کې داسې ریکارډونه جوړ کړي چې ماتول یې د بل هر فرانسوي لوبغاړي لپاره خورا ستونزمن وي.
