د جاپان سفیر اعلان کړی چې هېواد یې د افغانستان د پراختیایي پروژو د پلي کولو لپاره ۳۵ میلیونه ډالر ځانګړي کوي.
د طالبانو د اقتصاد وزارت د خبرپاڼې له مخې، کنیچي ماساموتو، د جاپان سفیر، ویلي چې ټوکیو به په ۲۰۲۶ کال کې شاوخوا ۹ میلیونه ډالر نور هم د کابل لپاره د اقلیمي بدلونونو او د اوبو کمښت پر ضد پروګرامونو کې ولګوي.
د طالبانو اقتصاد وزارت د یکشنبې په ورځ، د غبرګولي ۲۴مه، ویلي چې د طالبانو د اقتصاد وزیر دین محمد حنیف د جاپان له سفیر سره د پراختیایي همکاریو، بشري مرستو او د افغانستان د اقتصادي اړتیاوو په اړه خبرې کړې دي.
د یادې لیدنې پر مهال د طالبانو د اقتصاد وزیر له جاپان او نورو مرستندویو هېوادونو غوښتي چې د وچکالۍ، اقلیمي بدلونونو او افغانستان ته د بېرته ستنېدونکو کډوالو د ستونزو د حل لپاره خپلې اوږدمهالې مرستې دوامداره وساتي.
جاپان په وروستیو کلونو کې د نړیوالو بنسټونو او مرستندویه ادارو له لارې د افغانستان له مهمو مرسته کوونکو هېوادونو څخه ګڼل کېږي.
د خپرو شویو شمېرو له مخې، جاپان د ۲۰۲۱ کال د اګست میاشتې راهیسې تر اوسه پورې افغانستان ته له ۵۶۰ میلیونه ډالرو زیاتې بشري او پراختیایي مرستې ځانګړې کړې دي.
دا مرستې په داسې حال کې دوام لري چې افغانستان لا هم له اقتصادي ستونزو، بشري بحرانونو، د اوبو له کمښت او د اقلیمي بدلونونو له اغېزو سره مخ دی.
د دې مرستو اهمیت په دې کې دی چې د پراختیایي پروژو ملاتړ، د اقلیمي ستونزو مدیریت او د زیانمنو ټولنو مرسته کولی شي د افغانستان د اقتصادي او ټولنیز ثبات په پیاوړتیا کې مهم رول ولوبوي.
