د افغانستان د مدني ټولنې او بشري حقونو بنسټونو (ICSHRA) اعلان کړی چې د بندیانو خبریالانو د ازادۍ لپاره کمپاین پراخ شوی دی.
په خپره شوې اعلامیه کې ویل شوي چې دا کمپاین، چې مخکې د خبریالانو له خوا پیل شوی و، اوس د یادو بنسټونو په ملاتړ نوې پراخې مرحلې ته داخل شوی دی.
د اعلامیې له مخې، له ۱۰۰ څخه زیات د بشري حقونو مدافعین او خبریالان دې حرکت سره یوځای شوي او د حمید فرهادي، احمد شکیب نظري او بشیر هاتف د بېقید او شرط ازادۍ غوښتنه کوي.
دغه کمپاین د طالبانو له لوري د دې خبریالانو د نیولو په غبرګون کې پیل شوی، چې د بنسټونو په وینا د بشري حقونو، د بیان ازادۍ او معلوماتو ته د لاسرسي ښکاره نقض دی.
په اعلامیه کې ټینګار شوی چې د کمپاین پراخېدل د دې ښکارندویي کوي چې د رسنیو د سیستماتیک فشار او د بیان ازادۍ د محدودولو په اړه اندېښنې زیاتې شوې دي.
ICSHRA له ملګرو ملتونو، په ځانګړې توګه د بشري حقونو شورا او د بشري حقونو عالي کمېشنرۍ، او همداراز له نړیوالو رسنیزو بنسټونو غوښتي چې د خبریالانو د ازادۍ لپاره عملي او عاجل اقدامات وکړي.
همداراز له کورنیو او نړیوالو رسنیو غوښتنه شوې چې دا کمپاین پراخ پوښښ کړي او د بندیانو خبریالانو غږ نړۍ ته ورسوي.
دا کمپاین په داسې حال کې پراخېږي چې په افغانستان کې د رسنیو د ازادۍ په اړه اندېښنې ورځ تر بلې زیاتېږي.
