نیویارک ټایمز راپور ورکړی چې د امریکا حکومت د هغو افغان متحدانو د لېږد په اړه خبرې کوي چې دا مهال په قطر کې په یوه کمپ کې مېشت دي، څو یې د کانګو جمهوریت ته انتقال کړي.
د راپور له مخې، شاوخوا ۱۱۰۰ افغانان، چې پکې ژباړونکي، کمانډو ځواکونه او د امریکايي سرتېرو د کورنیو غړي شامل دي، د امریکا د وتلو راهیسې په نامعلوم وضعیت کې ژوند کوي.
د «افغان ایوک» بنسټ ویلي چې په دغو کسانو کې له ۴۰۰ څخه زیات ماشومان هم شامل دي او ډېری یې که افغانستان ته ستانه شي، له جدي خطر سره مخ کېدای شي.
د دې بنسټ په وینا، مخکې د بېرته ستنېدو طرحه هم مطرح شوې وه، خو د طالبانو د احتمالي غچ اخیستنې له امله یې اندېښنې راپورته کړې دي.
تر اوسه سپینې ماڼۍ او د امریکا د بهرنیو چارو وزارت په رسمي ډول په دې اړه څه نه دي ویلي.
د امریکا د بهرنیو چارو وزارت یوه لوړپوړي چارواکي مخکې ویلي وو چې واشنګټن هڅه کوي دغه کمپ وتړي او حتی د داوطلبانه ستنېدو لپاره مالي امتیازات هم په پام کې نیول شوي دي.
خو د کډوالو د حقونو فعالانو دا پلان «خیانت» بللی او خبرداری یې ورکړی چې دغه کسان له جدي خطرونو سره مخ کېدای شي.
دا وضعیت ښيي چې د دغو افغان متحدانو برخلیک لا هم نامعلوم پاتې دی.
