فرانس پرېس خبري آژانس راپور ورکړی چې اروپايي کمېسیون به په نږدې راتلونکې کې د افغان کډوالو د ایستلو په اړه د خبرو لپاره د طالبانو چارواکي بروکسل ته دعوت کړي.
د راپور له مخې، ټاکل شوې چې ډېر ژر کابل ته د دغې ناستې د وخت د ټاکلو لپاره رسمي لیک واستول شي.
ویل شوي چې دغه لیدنه د سویډن په همغږۍ پلان شوې او تر هغې وړاندې به دوه اروپايي پلاوي هم افغانستان ته سفر وکړي.
د اروپايي کمېسیون ویاند تایید کړې چې د اروپايي ټولنې چارواکي په بروکسل کې د طالبانو له استازو سره د یوې تخنیکي ناستې پر جوړولو کار کوي.
خو تر اوسه د دغې ناستې لپاره کومه مشخصه نېټه نه ده اعلان شوې.
دغه اقدام داسې مهال ترسره کېږي چې شاوخوا ۲۰ اروپايي هېوادونه د افغان کډوالو، په ځانګړي ډول د جرمي محکومیت لرونکو کسانو، د بېرته ستنولو لپاره د لارو چارو په لټه کې دي.
تر دې وړاندې څو اروپايي هېوادونو اروپايي ټولنې ته په یوه لیک کې غوښتنه کړې وه چې د افغان کډوالو د ایستلو د بهیر د چټکتیا لپاره ډیپلوماټیک او عملي حللارې ومومي.
دغه طرحه د بشري حقونو بنسټونو او د کډوالو د ملاتړو ډلو له نیوکو سره مخ شوې ده.
منتقدان وایي، هغه افغان کډوال بېرته افغانستان ته ستنول چې دغه هېواد له سخت بشري، اقتصادي او حقوقي بحران سره مخ دی، د ډېرو خلکو ژوند له خطر سره مخ کولای شي.
د اروپايي ټولنې د شمېرو له مخې، د ۲۰۱۳ او ۲۰۲۴ کلونو ترمنځ شاوخوا یو میلیون افغان وګړو په اروپايي هېوادونو کې د پناه غوښتنې دوسیې ثبت کړې دي.
په ۲۰۲۵ کال کې هم افغانان لا هم په اروپا کې د پناه غوښتنې تر ټولو لویه ډله پاتې شوې ده.
ځینو اروپايي هېوادونو، لکه جرمني، تر دې وړاندې د افغان کډوالو د ایستلو بهیر پیل کړی دی.
کارپوهان وایي، د افغان کډوالو په اړه د اروپايي ټولنې او طالبانو مستقیمې خبرې ښيي چې اروپايي هېوادونه هڅه کوي د مهاجرت اړوند کورني فشارونه مدیریت کړي؛ خو دا بهیر ښایي طالبانو ته د سیاسي مشروعیت ورکولو په اړه نوي بحثونه هم راپورته کړي.
