رویترز د یوه امریکایي چارواکي له قوله راپور ورکړی چې د امریکا ولسمشر ډونالډ ټرمپ د ایران له تازه وړاندیز څخه رضایت نه لري، ځکه د تهران طرحه د مذاکراتو په پیل کې د اټومي پروګرام موضوع نه رانغاړي.
د راپور له مخې، ټرمپ دغه وړاندیز له خپلو لوړپوړو امنیتي سلاکارانو سره ارزولی دی.
ایراني سرچینې وایي چې د تهران وړاندیز دا دی چې د اټومي پروګرام په اړه خبرې دې د جګړې تر پای او د خلیج د کښتۍچلونې اړوند اختلافاتو تر حل وروسته وځنډول شي.
خو واشنګټن ټینګار کوي چې د ایران اټومي موضوع باید د مذاکراتو له لومړۍ مرحلې د بحث اصلي محور وي.
دا اختلاف ښيي چې سره له دې چې تماسونه دوام لري، دواړه لوري لا هم د خبرو اترو د چوکاټ او لومړیتوبونو پر سر له جدي واټن سره مخ دي.
شنونکي وایي چې دا شکاف کولی شي د هر احتمالي توافق مسیر لا پیچلی کړي.
