محمد عمر داوودزی، د افغانستان پخواني د کورنیو چارو وزیر، د هرات او بدخشان ولایتونو وروستیو اعتراضونو او تحولونو ته په اشارې ویلي چې دغو دواړو ولایتونو د افغانستان په سیاسي تاریخ کې مهم رول لوبولی او د «پاچا جوړونې» او «پاچا بدلولو» اوږد سابقه لري.
هغه د سې شنبې په ورځ په خپله فېسبوک پاڼه کې په یوه یادښت کې لیکلي چې د افغانستان ډېری تاریخي شخړې او جګړې د «ښځې، سرو زرو او ځمکې» پر سر رامنځته شوې دي.
د داوودزي په وینا، په بدخشان کې روان کړکېچ تر ډېره د کانونو او سرو زرو له سرچینو سره تړاو لري، په داسې حال کې چې په هرات کې د ښځو پر وړاندې د طالبانو چلند او محدودیتونه د خلکو د نارضایتۍ مهم لامل ګرځېدلي دي.
پخواني وزیر ټینګار کړی چې په هرات کې د ښځو پر وړاندې د طالبانو چلند د خلکو پراخه غوسه راپارولې او وروستي اعتراضونه باید یوازې یوه عادي پېښه ونه ګڼل شي.
هغه زیاته کړې چې په هرات او بدخشان کې روان بدلونونه او پېښې پټې او پېچلې اړخونه لري او اړتیا ده چې له ډېر دقت او ژور تحلیل سره وڅېړل شي.
داوودزي د ښځو د ټولنیز مقام په اړه هم څرګندونې کړې او لیکلي یې دي: «حجاب د ښځو د عزت او کرامت د ساتنې لپاره دی، خو د عزت د ساتنې په نوم د یوې ټولنې بېآبرو کول د ناپوهۍ او بېخردۍ ښکاره نښه ده.»
نوموړي همداراز ویلي چې هرات او بدخشان دواړه د خپل جغرافیایي موقعیت او ستراتیژیک اهمیت له امله ځانګړی حساسیت لري.
د داوودزي څرګندونې داسې مهال مطرح کېږي چې په وروستیو ورځو کې په هرات کې د ښځو د نیولو او د طالبانو د محدودوونکو تګلارو پر ضد اعتراضونه پراخ شوي او په ورته وخت کې په بدخشان کې هم د ځايي اوسېدونکو او طالبانو ترمنځ د کړکېچ راپورونه خپاره شوي دي.
د دې موضوع مهم اړخ دا دی چې د افغانستان ځینې پخواني چارواکي اوسني تحولونه یوازې امنیتي یا ټولنیزې پېښې نه ګڼي، بلکې باور لري چې دا وضعیت ښايي ژور سیاسي، اقتصادي او ټولنیز عوامل ولري چې په راتلونکو میاشتو کې د هېواد پر وضعیت اغېز کولی شي.
