د اتریش د کرنتن ایالت د کلاګنفورت محکمې احمد جي، هغه ۲۵ کلن سوری وګړی چې د ویلاخ په ښار کې یې مرګونی برید ترسره کړی و، د ترهګریز برید په جرم په عمري بند محکوم کړی دی.
متهم د چهارشنبې په ورځ د محکمې په وروستۍ غونډه کې ټول تورونه ومنل او یو ځل بیا یې اعتراف وکړ چې غوښتل یې د لا ډېرو کسانو ژوند واخلي.
هغه محکمې ته ویلي: «غوښتل مې نور کسان هم ووژنم، تر ۱۴ یا ۱۵ کسانو پورې مې د وژلو نیت درلود، څو پولیس پر ما ډزې وکړي او شهید شم.»
احمد جي ځان د داعش غړی معرفي کړی او ویلي یې دي چې د ټیکټاک له لارې د دغې ډلې د تبلیغاتي ویډیوګانو تر اغېز لاندې راغلی و.
نوموړي د ۲۰۲۵ کال د فبرورۍ په ۱۵مه د «الله اکبر» په نارې وهلو د ویلاخ ښار پر خلکو برید وکړ.
په دغه برید کې یو ۱۴ کلن ځوان ووژل شو او څلور نور کسان ټپیان شول.
برید هغه مهال ودرېد چې یو سوری الاصله وګړی علاءالدین الحلبي مداخله وکړه او د برید د دوام مخه یې ونیوله.
الحلبي چې د اتریشي رسنیو له خوا د «ویلاخ اتل» بلل شوی، د ګڼو خلکو د ژوند د ژغورلو له امله ستایل شوی او راپورونه ښيي چې ښايي ژر د اتریش تابعیت هم ترلاسه کړي.
د اتریش قضايي چارواکو ویلي چې احمد جي به د تاوتریخوالي د تکرار د لوړ خطر او امنیتي اندېښنو له امله خپله سزا په یوه فوقالعاده خوندي زندان کې د ځانګړو تدابیرو لاندې تېره کړي.
دا پېښه په اتریش کې د افراطیت، انلاین تبلیغاتو او د ټولنیزو شبکو له لارې د سختدریځۍ د خپرېدو په اړه پراخ بحثونه راپارولي دي.
