د سویس پولیسو اعلان کړی چې د وینترتور ښار د اورګاډي په تمځي کې د چړې برید، چې درې کسان پکې ټپیان شوي، یو «ترهګریز عمل» و.
د امنیتي چارواکو په وینا، د دې برید شکمن یو ۳۱ کلن سړی دی چې د سویس او ترکیې دوهګونی تابعیت لري او د زوریخ په شمال کې د وینترتور ښار اوسېدونکی دی. نوموړی له برید وروسته سمدستي نیول شوی دی.
دا پېښه د ځایي وخت له مخې د سهار شاوخوا ۶:۳۰ بجې رامنځته شوې ده.
د زوریخ کانتون د امنیت مشر ماریو فهر دغه برید «یو کرکجن ترهګریز عمل» وباله او ویې ویل چې د پولیسو چټک غبرګون د یوې لا سترې فاجعې مخه ونیوله.
هغه همدارنګه د یوې ښځینه ښوونکې له زړورتیا ستاینه وکړه چې د خپلو زدهکوونکو د ساتنې لپاره د بریدګر مخې ته ودرېده.
فهر وویل:
«هلته څو زړور کسان موجود وو او هغې ښوونکې بېساری چلند وکړ.»
د زوریخ کانتون د پولیسو قوماندان ماریوس وایرمان ویلي چې پولیس له ۲۰۱۵ کال راهیسې د شکمن په اړه معلومات درلودل.
د هغه په وینا، دغه کس مخکې د داعش ډلې د تبلیغاتو د خپرولو له امله تر څار لاندې و او د برید انګېزه باید د افراطګرۍ په چوکاټ کې وڅېړل شي.
سویسي ورځپاڼې «بلیک» یوه ویډیو خپره کړې چې پکې یو سړی له برید وروسته د اورګاډي له تمځي وځي او «الله اکبر» شعار ورکوي.
د طبي راپورونو له مخې، د دې برید درې واړه ټپیان په روغتون کې تر درملنې لاندې دي.
یو ټپي د پښې، دویم د غاړې او درېیم د ورن له ناحیې ژوبل شوی دی.
د زوریخ پولیسو ویلي چې یو ټپي د سختو ټپونو له امله بېړني عملیات ته لېږدول شوی دی.
دا برید په داسې حال کې ترسره کېږي چې سویس، د ډېرو اروپايي هېوادونو په پرتله، تر دې دمه له ورته ترهګریزو بریدونو سره لږ مخ شوی و.
