د افغانستان لپاره د روسيې د ولسمشر ځانګړي استازي ضمير کابلوف ويلي چې که د کابل حکومت غوښتنه وکړي، مسکو چمتو دی د روان ميلادي کال په دويمه نيمايي کې افغانستان ته نوې بشري مرستې ولېږي.
هغه افغانستان کې د روان بشري بحران په اړه ويلي چې د روسيې د خوراکي مرستو يوه برخه د خوړو نړيوال پروګرام له لارې افغانستان ته رسېدلې ده.
کابلوف ټينګار کړی چې افغانستان لا هم د نړۍ له سترو بشري بحرانونو څخه يو تجربه کوي او د نړيوالې ټولنې لا زيات ملاتړ ته اړتيا لري.
دغه روسي چارواکي په افغانستان کې د ملګرو ملتونو د رول د پياوړتيا او د بشري وضعيت د ښه کولو لپاره د نړيوالې ټولنې د عملي اقداماتو د زياتېدو غوښتنه هم کړې ده.
هغه په ورته وخت کې د نړيوالو مرستندويه بنسټونو د بودجې د کمېدو په اړه اندېښنه څرګنده کړې او خبرداری يې ورکړی چې د مرستو کمښت ښايي د ميليونونو افغانانو وضعيت لا سخت کړي.
افغانستان په وروستيو کلونو کې له سخت اقتصادي بحران، د بېوزلۍ له زياتېدو، بېکارۍ او د کډوالو د پراخې بېرته ستنېدو له ستونزو سره مخ شوی دی.
نړيوالو بنسټونو څو ځله خبرداری ورکړی چې په افغانستان کې د بشري وضعيت خرابوالی لا هم دوام لري.
