د خبریالانو د ساتنې کمېټې له اروپایي کمېسیون غوښتي چې بروکسل ته د طالبانو د پلاوي د بلنې پروګرام لغوه کړي.
د دغې کمېټې مرستیال ټام ګیبسن د طالبانو بلنه «د شرم وړ» بللې او ویلي یې دي چې دا اقدام هغې ډلې ته مشروعیت ورکوي چې په افغانستان کې د رسنیو د ځپلو او پراخ سانسور مسؤله ده.
هغه د دوشنبې په ورځ، د ثور ۲۸مه، ټینګار کړی چې په داسې حال کې چې طالبان پر رسنیو فشار او د بیان ازادۍ محدودول دوام ورکوي، د اروپایي کمېسیون له خوا د دې ډلې رسمي بلنه «ظالمانه اقدام» ګڼل کېږي.
د خبریالانو د ساتنې کمېټې ویلي چې طالبانو واک ته له رسېدو وروسته خپلواکې رسنۍ تړلې، خبریالان یې نیولي او پر کورنیو رسنیو یې د سانسور او سخت څار فضا حاکمه کړې ده.
دغه نړیوال بنسټ زیاته کړې چې ګڼ افغان خبریالان اوس د وېرې او ګواښ په فضا کې کار کوي او د کورنیو رسنیو لویه برخه د طالبانو پر تبلیغاتو بدله شوې ده.
د راپورونو له مخې، اروپایي کمېسیون غواړي د طالبانو استازي بروکسل ته د اخراجېدونکو کډوالو د بېرته ستنولو په اړه د خبرو لپاره دعوت کړي.
خو اروپایي کمېسیون ویلي چې دغه بلنه د طالبانو د حکومت د رسمیت پېژندلو معنا نه لري.
دې موضوع د بشري حقونو د بنسټونو او د رسنیو د ازادۍ د ملاتړو ترمنځ پراخ غبرګونونه راپارولي دي.
شنونکي وایي، اروپایي هېوادونه له یوې خوا د مهاجرت او د کډوالو د بېرته ستنولو په اړه له طالبانو سره تعامل غواړي، خو له بلې خوا په افغانستان کې د بشري حقونو او د رسنیو د ازادۍ د وضعیت له امله له زیاتېدونکو نیوکو سره مخ دي.
د کارپوهانو په باور، له طالبانو سره هر ډول رسمي تعامل پرته له دې چې پر دغې ډلې د بشري حقونو په برخه کې فشار راوړل شي، کولای شي د طالبانو نړیوال موقف پیاوړی او د افغان خپلواکو رسنیو غږ کمزوری کړي.
