مسکو اعلان کړی چې د روان میلادي کال په لومړیو درېیو میاشتو کې ۴۰ افغان وګړو په روسیه کې د پناه غوښتنه کړې ده.
د روسیې تاس خبري آژانس د یکشنبې په ورځ، د ثور په ۲۷مه، راپور ورکړی چې په دې موده کې په روسیه کې د پناه غوښتنې ټولې دوسیې یو زر او ۳۲۹ ته رسېدلې دي.
د شمېرو له مخې، د اوکراین وګړي د ۷۱۲ غوښتنلیکونو سره په لومړي ځای کې دي. له هغې وروسته سوریه د ۲۳۲ غوښتنلیکونو او ایران د ۵۲ غوښتنلیکونو سره په راتلونکو ځایونو کې قرار لري.
افغانان د ۴۰ غوښتنلیکونو سره په څلورم او د اوزبیکستان وګړي د ۲۵ غوښتنلیکونو سره په پنځم ځای کې دي.
دغه شمېرې ښيي چې د تېر کال د ورته مودې په پرتله د افغان پناه غوښتونکو شمېر کم شوی دی.
د ۲۰۲۵ کال په لومړیو درېیو میاشتو کې د افغانانو ۶۴ د پناه غوښتنې دوسیې ثبت شوې وې.
راپورونه همدارنګه ښيي چې روسیه ډېر کم د افغان وګړو د پناه غوښتنې غوښتنې مني او د تېرو کلونو ګڼ شمېر دوسیې رد شوې دي.
په روسیه کې پناه ترلاسه کول غوښتونکو ته د قانوني اوسېدو اجازه، د جواز پرته د کار حق، روغتیایي او تعلیمي خدماتو ته لاسرسی او ځینې ټولنیزې مرستې ورکوي.
کارپوهان وایي، د افغان پناه غوښتونکو په منلو کې د روسیې سختدریځ او د اقامت د فرصتونو محدودیت د دې لامل شوی چې د افغانانو لېوالتیا دغه هېواد ته کمه شي.
