د طالبانو یوه چارواکي حبیبالله بدر له بيبيسي سره په مرکه کې د لومړي ځل لپاره د جګړې پر مهال د خپل رول په اړه ویلي چې په کابل کې د طالبانو د ځانمرګو بریدګرو د عملیاتو مسوولیت یې پر غاړه درلود.
بدر ویلي چې د خپلو پخوانیو فعالیتونو له امله یې د کابل لارې او کوڅې په ښه توګه پېژندلې او د ځینو عملیاتو لپاره به اوږدمهاله پلانونه جوړېدل.
خو هغه د مشخصو بریدونو په اړه له جزیاتو ورکولو ډډه کړې او ویلي یې دي چې د تېر وخت په اړه خبرې ښايي خلک خپه کړي او «زخمونه بېرته تازه کړي».
د افغانستان د شل کلنې جګړې پر مهال د طالبانو په ځانمرګو بریدونو کې زرګونه کسان، چې ملکي وګړي هم پکې شامل وو، وژل شوي او ټپیان شوي دي.
بدر د ملکي وګړو د مرګژوبلې په اړه د یوې پوښتنې په ځواب کې ویلي چې د طالبانو هدف د امریکايي ځواکونو کاروانونه او پوځي اډې وې او له خلکو غوښتل کېدل چې له دغو سیمو لرې پاتې شي.
خو هغه په ملکي سیمو کې د ترسره شویو بریدونو په اړه له مستقیم ځواب ورکولو ډډه وکړه.
حبیبالله بدر د طالبانو له بیا واک ته رسېدو وروسته د دې ډلې د زندانونو د ادارې د مرستیال په توګه وټاکل شو؛ د دې ادارې په یوه زندان کې هغه مهال بندیان ساتل کېدل چې بدر خپله د تېر حکومت پر مهال په همدې زندان کې د اعدام د حکم د عملي کېدو په تمه و.
د بدر څرګندونې یو ځل بیا د طالبانو د اوسنیو چارواکو د ځینو غړو پوځي سابقه او د جګړې پر مهال د هغوی رول په ډاګه کوي.
