د طالبانو ویاند ذبیحالله مجاهد له بيبيسي سره په مرکه کې ویلي چې اصلي نوم یې «طاهر شاه صدیقي» دی. د دې رسنۍ په وینا، نوموړي دا نوم د لومړي ځل لپاره په علني ډول اعلان کړی دی.
مجاهد د طالبانو پر وړاندې د جګړې پر مهال کلونه له رسنیو سره د «ذبیحالله مجاهد» په مستعار نوم اړیکې درلودې او د دې ډلې له واک ته رسېدو وروسته یې هم له همدې نوم څخه کار اخیست.
هغه په دې مرکه کې د طالبانو د ۲۰۲۱ کال د کابل له نیولو وروسته په لومړنۍ خبري غونډه کې د ورکړل شویو ژمنو، په ځانګړي ډول د ښځو د حقونو په اړه هم پوښتل شوی دی.
مجاهد ویلي چې طالبان د ښځو حقونه، د بیان ازادي او نور حقوق د خپلې شرعي تفسیر په چوکاټ کې مني. هغه د ښځو د کار په ځینو برخو کې د بندیز په دفاع کې ادعا کړې چې د هغوی حضور ښايي د «بېاخلاقۍ» زمینه برابره کړي.
د طالبانو ویاند د ښځو او نجونو پر زدهکړو د دوامدار بندیز په اړه ویلي چې دا موضوع لا هم تر ارزونې لاندې ده او طالبان د هغه په وینا د یوه «شرعي حل» په لټه کې دي.
مجاهد د مرکې په بله برخه کې پر رسنیو لګېدلي محدودیتونه هم توجیه کړي او ویلي یې دي چې طالبان اجازه نه ورکوي رسنۍ هر هغه څه خپاره کړي چې غواړي. د هغه په وینا، د رسنیو فعالیت باید د اسلامي قوانینو او ارزښتونو خلاف نه وي.
د مجاهد څرګندونې په داسې حال کې دي چې د ښځو او نجونو پر زدهکړو، کار او ټولنیز حضور د طالبانو محدودیتونه، او پر رسنیو بندیزونه، په تېرو کلونو کې د بشري حقونو او رسنیو د بنسټونو له مهمو نیوکو سره مخ شوي دي.
