د طالبانو د کورنیو چارو وزیر سراجالدین حقاني له هغو افغان سیاسي مشرانو وغوښتل چې له هېواده بهر مېشت دي، افغانستان ته ستانه شي.
حقاني، چې پنجشېر ته له سفر وروسته بامیان ته تللی، په دغه ولایت کې د خپلې وینا پر مهال وویل چې له افغانستانه بهر مېشت کسان باید هېواد ته راستانه شي.
هغه وویل: «کسان چې بهر ژوند کوي، په درناوي ترې غوښتنه کوو چې کور یې وطن دی. له دوحې تړون وروسته ټول عفو شوي دي او له هېچا سره حساب نه کېږي.»
د طالبانو د کورنیو چارو وزیر همداراز وویل چې په افغانستان کې قومي، سیمهییز او ژبني اختلافونه د نورو هېوادونو د دښمنانه هڅو پایله ده.
حقاني زیاته کړه چې افغانان باید اوس د یوه واحد نظام تر چتر لاندې د یووالي، ورورولۍ او همبستګۍ په لور حرکت وکړي.
هغه ټینګار وکړ چې د ټولنې یووالی او اتفاق د هېواد د امنیت او ثبات لپاره مهم دی او ویې ویل، که ټولنه متحده وي، هېواد به ناامنه نه شي.
د حقاني څرګندونې په داسې حال کې دي چې طالبانو له واک ته له رسېدو وروسته څو ځله له سیاسي مخالفانو او د تېر حکومت له چارواکو غوښتي چې افغانستان ته ستانه شي او ویلي یې دي چې هغوی ته عمومي عفوې ورکړل شوې دي.
خو یو شمېر مخالفانو د افغانستان د امنیتي وضعیت او د بېرته ستنېدو د شرایطو په اړه اندېښنې څرګندې کړې دي. د بېلابېلو سیاسي ډلو د ګډون او د یوه ټولشموله حکومت جوړول هم لا هم د طالبانو او مخالفانو ترمنځ د اختلاف له مهمو موضوعاتو څخه دي.
