د طالبانو د عدلیې وزارت اعلان کړی چې د پولیسو قانون د دې ډلې د مشر له توشیح وروسته په رسمي جریده کې خپور شوی دی.
د دغه وزارت په خبرپاڼه کې ویل شوي چې د پولیسو قانون یوه مقدمه، دوه بابونه، پنځه فصلونه او ۵۳ مادې لري او د طالبانو د کورنیو چارو وزارت به یې د تطبیق مسؤل وي.
په دغه قانون کې د پولیسو دندې او صلاحیتونه د امنیت د تأمین، د پولو د امنیت، ترافیک، زندانونو، د نشهيي موادو پر وړاندې د مبارزې، انسانتښتونې او د انسانانو د قاچاق په برخو کې مشخص شوي دي.
په نوي قانون کې د کسانو د هویت د تثبیت، جلب او احضار، د تورنو کسانو د نیولو، تلاشي او د پولیسو له لوري د وسایلو د کارولو څرنګوالی هم تشریح شوی دی.
د طالبانو د عدلیې وزارت د دې قانون د مادو د محتوا په اړه نور جزیات نه دي ورکړي.
د دغه قانون خپرېدل په داسې حال کې دي چې طالبان له واک ته له رسېدو وروسته د افغانستان په بېلابېلو سیمو کې د امنیت او د خپلو قوانینو د پلي کولو مسؤلیت پر امنیتي جوړښتونو سپارلی دی.
