د ازبکستان امنیتي چارواکو یو افغان وګړی د دغه هېواد د ترمز په نړیوال سوداګریز مرکز کې د تریاکو د پلورلو پر مهال نیولی دی.
د ازبکستان امنیتي خدمت ویلي چې دغه کس له ځان سره ۵۰۶ ګرامه تریاک لرل او غوښتل یې دغه اندازه نشهيي مواد د ۲۵۰۰ امریکايي ډالرو په بدل کې وپلوري.
د راپور له مخې، د دغه افغان وګړي د نیولو عملیات د ګمرک ادارې او د سرخاندریا ولایت د پولیسو په همکارۍ ترسره شوي دي.
ازبکستاني چارواکو ویلي چې دغه کس په ۲۰۰۳ کال کې زېږېدلی او تریاک یې په پنځو بستو کې د خپل بدن دننه پټ کړي وو، څو له پولې څخه د تېرېدو پر مهال یې د ګمرکي او سرحدي پلټنو له مامورانو پټ وساتي.
د ازبکستان د امنیتي خدمت په وینا، نوموړی دغه هېواد ته له ننوتلو وروسته د نشهيي موادو د سپارلو لپاره د ترمز نړیوال سوداګریز مرکز ته تللی و، چې د امنیتي ځواکونو په عملیاتو کې ونیول شو.
د ازبکستان امنیتي چارواکو د دغه کس پر وړاندې جنايي دوسیه پرانیستې او د احتمالي همکارانو د پېژندلو لپاره یې څېړنې پیل کړې دي.
د ترمز نړیوال سوداګریز مرکز د سرخاندریا ولایت په سیمه کې او د افغانستان پولې ته څېرمه موقعیت لري.
دغه مرکز د حیرتان سرحدي دروازې ته نږدې جوړ شوی او د ۱۴۰۳ لمریز کال په وږي میاشت کې په رسمي ډول پرانیستل شوی و.
د دې مرکز د جوړېدو هدف د افغانستان او ازبکستان ترمنځ د سرحدي سوداګرۍ اسانتیا، د دواړو هېوادونو سوداګرو ته د مناسب چاپېریال برابرول او د اقتصادي اړیکو پراخول بلل شوي دي.
خو د نشهيي موادو د انتقال او پلور په تور د دغه افغان وګړي نیول ښيي چې په دې سرحدي سیمه کې امنیتي او ګمرکي څارنه هم په جدي ډول ترسره کېږي.
ازبکستاني چارواکو تر دې مخکې هم د افغانستان پولې ته څېرمه د سرخاندریا ولایت په سیمه کې د نشهيي موادو د څو محمولو د کشف او ضبط خبر ورکړی و.
