د افغانستان د متحدې جبهې مشر سمیع سادات وایي، د تېرو کلونو تجربو ښودلې چې له روښانه سیاسي او پوځي پلان پرته د جګړې پیل، په افغانستان کې د باور وړ او باثباته نظام د رامنځته کېدو مخه نیولې ده.
سادات له «لانګ وار ژورنال» سره په مرکه کې وویل، متحدې جبهې د طالبانو پر ضد د پوځي عملیاتو له پیل مخکې د پخوانیو ناکامیو او بریاوو ارزونه کړې او د همدې ارزونې پر بنسټ یې د مبارزې لپاره مشخصه ستراتیژي جوړه کړې ده.
د هغه په وینا، جبهې د افغانستان یو شمېر پخواني جنرالان سره راټول کړي او د نړیوالې همغږۍ یوه شبکه یې رامنځته کړې، څو د پوځي عملیاتو د پیل لپاره لازم شرایط برابر شي.
د سمیع سادات په مشرۍ متحدې جبهې د زمري په ۱۰مه د طالبانو پر ضد د خپلو پوځي عملیاتو د پیل اعلان وکړ او ویې ویل چې لومړنی عملیات یې له کندهار ولایت څخه پیل شوی او د «افغانستان د ازادۍ ماموریت» برخه ده.
سادات وروسته له دې اعلان، د پخواني افغانستان د پوځ په پوځي یونیفورم کې یوه ویډیو خپره کړه او د عملیاتو پیل یې تأیید کړ. هغه وویل چې له طالبانو سره د خبرو له لارې د هوکړې هڅې پایله نه ده ورکړې.
هغه همداراز طالبان د بشري حقونو د پراخو سرغړونو او په افغانستان کې د ترهګرو ډلو د بیا فعالېدو د زمینې برابرولو مسؤل وبلل.
د متحدې جبهې مشر د ناټو له غړو هېوادونو وغوښتل چې د طالبانو، القاعده، داعش او تحریک طالبان پاکستان پر ضد د مبارزې لپاره د دې جبهې له ځواکونو سره تجهیزاتي مرسته وکړي.
سادات ټینګار وکړ چې د دوی وروستی هدف د طالبانو د واکمنۍ پای، د اساسي قانون پر بنسټ د نظام بیا رامنځته کول او داسې حکومت جوړول دي چې مدني ازادۍ او د ټولو وګړو حقوق پکې د قانون له مخې تضمین شي.
