د طالبانو د اطلاعاتو او فرهنګ وزارت مرستیال، مهاجر فراهي، له رسنیو غوښتي چې د طالبانو د بیا واکمنېدو د پنځمې کلیزې په مناسبت د هغه څه په اړه ځانګړي پروګرامونه جوړ او خپاره کړي چې دغه ډله یې د خپلې پنځه کلنې ادارې «لاسته راوړنې» بولي.
د هغه په وینا، رسنۍ باید د زمري د ۲۴مې د کلیزې د مراسمو تر پوښښ سربېره، د هغه څه په اړه هم بېلابېل پروګرامونه تولید کړي چې طالبان یې د افغانستان «شل کلن اشغال» یادوي، څو د ده په خبره، د افغانستان خلک او نړیواله ټولنه له دغو موضوعاتو خبر شي.
مهاجر فراهي له رسنیو دا غوښتنه هم کړې چې د هغه څه په اړه چې نوموړي د افغانستان د خلکو پر وړاندې د پاکستان د پوځ «ناسم اقدامات» وبلل، پراخ راپورونه او مطالب خپاره کړي.
دا غوښتنه په داسې حال کې مطرح کېږي چې طالبانو د ۲۰۲۱ کال په اګست کې له بیا واکمنېدو وروسته پر رسنیو پراخ محدودیتونه لګولي دي. د رسنیو د ازادۍ ملاتړو بنسټونو څو ځله خبرداری ورکړی چې طالبان د محتوايي محدودیتونو، د خبریالانو د نیولو او سانسور له لارې د رسنیو د خپلواک فعالیت فضا محدوده کړې ده.
طالبان ادعا کوي چې په تېرو پنځو کلونو کې یې امنیت او د بیارغونې بهیر پیاوړی کړی، خو منتقدان د پراخې بېوزلۍ، د ښځو او نجونو پر حقونو او ازادیو د محدودیتونو او پر رسنیو د فشارونو په یادولو سره دا ادعا ردوي.
