د امریکا د دفاع وزیر پیټ هګسټ د هغو دوو امریکايي سرتېرو د وژل کېدو په غبرګون کې، چې واشنګټن یې مسؤلیت پر ایران پورې تړلی، ویلي چې د هغوی قرباني به د امریکا هوډ لا پیاوړی کړي.
هګسټ د امریکا د مرکزي قوماندانۍ (سینټکام) د اعلامیې په بیا خپرولو سره په اېکس ټولنیزه شبکه کې لیکلي: «په خیر لاړ شئ، اتلانو. د هغوی قرباني یوازې زموږ عزم لا ټینګوي.»
سینټکام مخکې ویلي وو چې دغه دوه امریکايي سرتېري د جولای په ۱۷مه په اردن کې د امریکا او د هغې د متحدانو د ځواکونو د دفاع پر مهال، د هغو بالستیک توغندیزو او بېپیلوټه الوتکو د بریدونو پر وړاندې وژل شوي چې واشنګټن یې مسؤلیت ایران ته منسوبوي.
د اعلامیې له مخې، یو امریکايي سرتېری لا هم ورک دی او څلور نور سرتېري له درملنې وروسته د اردن له روغتونونو رخصت شوي دي. همدارنګه، یو شمېر نور هغه پوځیان چې سپک ټپونه یې لرل، د طبي ارزونې وروسته بېرته خپلو دندو ته ستانه شوي دي.
سینټکام ویلي، د وژل شویو سرتېرو د کورنیو د محرمیت د ساتنې لپاره به د هغوی هویت او د پېښې نور جزییات تر هغه مهاله خپاره نه شي چې لومړی د هغوی خپلوان په رسمي ډول خبر شي.
ایران تر اوسه د سینټکام د دې اعلامیې او د امریکا د هغه تور په اړه، چې بریدونه یې ایران ته منسوب کړي، رسمي غبرګون نه دی ښودلی.
