د بېړیو د تعقیب نړیوال سیستم «مارین ټرافیک» ویلي، د جولای په ۱۶مه په هرمز تنګي کې د بېړیو تګراتګ د تېرو درېیو اوونیو تر ټولو ټیټې کچې ته رسېدلی او یوازې اته تایید شوي تګراتګونه پکې ثبت شوي دي.
د راپور له مخې، ډېری بېړۍ د ایران له سمندري مسیر څخه تېرې شوې، په داسې حال کې چې د عمان له اړخ څخه د هېڅ بېړۍ د تېرېدو ثبت نه دی شوی.
د هرمز تنګي د تګراتګ دغه کمښت داسې مهال رامنځته شوی چې په سیمه کې امنیتي کړکېچونه لا هم دوام لري. هرمز تنګی د نړۍ له مهمو سمندري لارو څخه ګڼل کېږي او د نړیوال نفتو او سوداګریزو توکو د لېږد یوه ستراتیژیکه لار بلل کېږي.
«مارین ټرافیک» په خپل راپور کې د دې کمښت مستقیم علت نه دی څرګند کړی، خو د سیمې روان امنیتي وضعیت د نړیوالو سمندري لارو د خوندیتوب په اړه اندېښنې لا پسې زیاتې کړې دي.
