د ایران د بهرنیو چارو وزارت مرستیال کاظم غریبآبادي ویلي، د امریکا لهخوا د تعهداتو له نقض وروسته نور د «اسلاماباد تفاهملیک» په نوم کومه هوکړه شتون نه لري او تهران هم ځان د هغې د موادو پلي کولو ته ژمن نه ګڼي.
غریبآبادي دغه څرګندونې په داسې حال کې کړې چې د امریکا لهخوا د ایران د سمندري محاصرې د بیا پیل او د دواړو هېوادونو د پوځي کړکېچ د دوام راپورونه خپاره شوي دي. هغه وویل، د دې تفاهملیک حقوقي چوکاټ او بنسټونه له منځه تللي دي.
هغه زیاته کړه: «نور داسې کوم تفاهملیک نشته چې پرې خبرې وشي. امریکا د دې تفاهملیک د له منځه وړلو لپاره ټول اقدامات ترسره کړي او هېڅ هېواد باید له ایران څخه د دې سند د تعهداتو د عملي کولو تمه ونه لري.»
د ایران د بهرنیو چارو وزارت مرستیال ټینګار وکړ چې واشنګټن خپلې ټولې ژمنې ماتې کړې دي او له همدې امله تهران هم نور د دې هوکړې پر وړاندې ځان مسؤل نه ګڼي.
د غریبآبادي څرګندونې وروسته له هغې وشوې چې د امریکا مرکزي قوماندانۍ (سینټکام) د ایران د جنوبي بندرونو د سمندري محاصرې د بیا پیل خبر ورکړ.
د راپورونو له مخې، د دغې محاصرې لومړی پړاو د حمل له ۲۴مې څخه د غبرګولي تر ۲۸مې دوام کړی و، خو وروسته د اسلاماباد د تفاهملیک له مخې، چې ویل کېږي د ایران ولسمشر مسعود پزشکیان او د امریکا ولسمشر ډونالډ ټرمپ ترمنځ لاسلیک شوی و، درول شوی او د هرمز تنګي له لارې د بېړیو تګ راتګ بېرته پیل شوی و.
اوس، د پوځي ترینګلتیا له بیا زیاتېدو سره، ایراني چارواکي وایي چې دغه تفاهملیک نور پای ته رسېدلی او اعتبار نه لري.
