اسرائیلي ورځپاڼې «هاآرتص» په یوه څېړنیز راپور کې ادعا کړې چې د اسرائیل بهرنۍ استخباراتي ادارې (موساد) د ایران د حکومت د بدلون د یوې ادعا شوې طرحې په چوکاټ کې، د ایران پخوانی ولسمشر محمود احمدينژاد د احتمالي همکارۍ لپاره تر ارزونې لاندې راوستی و او هغه یې د حکومت تر احتمالي نسکورېدو وروسته د ایران د رهبرۍ له ممکنه څېرو څخه ګڼلی و.
د راپور له مخې، د موساد او احمدينژاد ترمنځ ادعا شوې اړیکې د ۲۰۲۳ کال د اکتوبر اوومې نېټې د حماس له برید څخه شاوخوا یو کال مخکې پیل شوې وې. هاآرتص ادعا کوي چې د موساد ارزونو ښودله، احمدينژاد د ولسمشرۍ له دورې وروسته خپل دریځونه بدل کړي او د اسلامي جمهوریت له منتقدانو څخه شوی دی.
ورځپاڼه لیکي، اسرائیلي چارواکو په ځانګړي ډول د احمدينژاد هغه څرګندونې ارزولې وې چې د ایران د اټومي پروګرام او نړیوالو بندیزونو په اړه یې کړې وې، او دې پایلې ته رسېدلي وو چې ښايي نوموړی له موساد سره د همکارۍ لپاره چمتو وي.
د هاآرتص په ادعا، د موساد هغه مهال مشر ډیویډ بارنیا دا دوسیه په مستقیم ډول تعقیبوله او وروسته احمدينژاد د اسرائیل له مهمو استخباراتي سرچینو څخه ګرځېدلی و. راپور زیاتوي چې د حکومت د بدلون په ادعا شوې طرحه کې، احمدينژاد ته د انتقالي دورې د مشر په سترګه کتل کېدل.
په راپور کې د ایران دننه د نفوذ، په عراق کې د کردي ځواکونو د روزنې، د ځینو قومي اقلیتونو د بسیج او د پوځي عملیاتو لپاره د ځمکني دهلېز د جوړولو په څېر نورو ادعا شویو پروګرامونو ته هم اشاره شوې ده.
هاآرتص ادعا کړې چې دا طرحه د اسرائیل د لوړپوړو چارواکو ترمنځ د اختلافاتو او د میداني تحولاتو له امله د بشپړ عملي کېدو مخکې ناکامه شوه.
دغه راپور د ورځپاڼې په وینا، له ۳۰ څخه د زیاتو سیاسي، امنیتي، ډیپلوماتیکو او بهرنیو سرچینو سره د مرکو پر بنسټ چمتو شوی دی. تر اوسه محمود احمدينژاد، د ایران حکومت او د اسرائیل چارواکو د دې ادعاوو په اړه رسمي غبرګون نه دی ښودلی، او دغه ادعاوې په خپلواکه توګه نه دي تایید شوې.
