د اسلامي همکاریو سازمان اعلان کړی چې د دې سازمان د سرمنشي مرستیال طارق علي بخیت د اسلامي نړۍ د ټولنې له سرمنشي محمد بن عبدالکریم العیسی سره د افغانستان د وضعیت او د افغانانو د ملاتړ پر لارو چارو خبرې کړې دي.
دا لیدنه د شنبې په ورځ، د چنګاښ په ۲۰مه، په اسلاماباد کې د اسلامي همکاریو سازمان د ښځو چارو وزیرانو د نهم کنفرانس په څنډه کې ترسره شوه.
د اسلامي همکاریو سازمان د خبرپاڼې له مخې، دواړو لورو د افغانستان د خلکو د بشري او پراختیايي ستونزو د هواري، د اسلامي هېوادونو او نړیوالې ټولنې ترمنځ د همغږۍ د پیاوړتیا او د بشري مرستو د دوام په اړه بحث وکړ.
دا غونډه په داسې حال کې ترسره کېږي چې د اسلامي همکاریو سازمان د ښځو چارو وزیرانو دوه ورځنی کنفرانس هم روان دی. د دې کنفرانس اصلي موضوع د ښځو ټولنیز، اقتصادي او سیاسي پیاوړتیا او هغه ننګونې دي چې ښځې ورسره مخ دي.
د رسمي اجنډا له مخې، د افغانستان د ښځو وضعیت هم د دې کنفرانس د بحث مهمه برخه ده، خو تر اوسه نه ده روښانه شوې چې په دې غونډه کې د افغان ښځو استازیتوب څوک کوي.
افغانستان د اسلامي همکاریو سازمان غړی هېواد دی، خو د طالبانو حکومت هېڅ رسمي پلاوی په دې کنفرانس کې ګډون نه لري. ډیپلوماتیکې سرچینې وایي، د طالبانو حکومت د غړو هېوادونو له خوا د نه رسمیت پېژندلو له امله دې ډلې ته بلنه نه ده ورکړل شوې.
دا غونډه په داسې وخت کې ترسره کېږي چې طالبان لا هم د افغانستان پر ښځو او نجونو د زدهکړو، کار او ټولنیز حضور پراخ محدودیتونه لګولي دي. اسلامي همکاریو سازمان او ګڼو اسلامي هېوادونو تر دې وړاندې څو ځله له طالبانو غوښتي چې دا محدودیتونه لرې کړي.
