هند او طالبان د کرنې او مالدارۍ په برخو کې د همکاریو د پراختیا لپاره د یوې ګډې کاري ډلې پر جوړېدو سلا شوي دي. دا پرمختګ په داسې حال کې رامنځته کېږي چې نوی ډهلی لا هم د طالبانو حکومت په رسمیت نه پېژني، خو له دې ډلې سره خپلې تخنیکي او اقتصادي اړیکې پراخوي.
دا هوکړه د هند د کرنې وزیر شیوراج سینګ چوهان او د طالبانو د کرنې، اوبو لګولو او مالدارۍ وزیر عطاءالله عمري ترمنځ د نوي ډهلي په لیدنه کې وشوه.
د هند د بهرنیو چارو وزارت د خبرپاڼې له مخې، دواړو لورو د اصلاح شویو تخمونو، کرنیزو څېړنو، اوبو لګولو، ظرفیت لوړونې، مالدارۍ او د کرنیزو محصولاتو د سوداګرۍ په برخو کې د همکاریو پر پراختیا خبرې کړې دي.
طالبانو په دې لیدنه کې له هند څخه غوښتي چې د اصلاح شویو تخمونو، تخنیکي پوهې او ګډو څېړنیزو پروګرامونو له لارې د افغانستان د غنمو د تولید په زیاتولو کې مرسته وکړي.
په مقابل کې، د هند د کرنې وزیر ویلي، هېواد یې چمتو دی چې افغانستان ته د غنمو، جوارو او کچالو باکیفیته تخمونه، د اقلیمي بدلون پر وړاندې مقاوم ډولونه او د هند د کرنیزو څېړنو شورا تخنیکي تجربې وړاندې کړي.
دواړو خواوو همدارنګه د اوبو د سرچینو د مدیریت، د اوبو لګولو د پراختیا، د اوبو د زېرمه کولو او د اقلیمي بدلونونو د اغېزو د کمولو په اړه هم خبرې کړې دي. هند ویلي چې د څاڅکي اوبو لګولو، د باراني اوبو د راټولولو، د اوبو د زېرمه کولو د حوضونو، کوچنیو بندونو او د اوبو د اغېزمن مدیریت خپلې تجربې به له افغانستان سره شریکې کړي.
دا هوکړه په داسې وخت کې شوې چې په وروستیو میاشتو کې هند ته د طالبانو د چارواکو سفرونه او تماسونه زیات شوي دي. شنونکي دا بهیر د طالبانو د بهرنیو اړیکو د متنوع کولو هڅه بولي، په ځانګړي ډول په داسې شرایطو کې چې د اسلاماباد او طالبانو ترمنځ اړیکې له کړکېچ سره مخ دي. خو سره له دې، هند لا هم د طالبانو حکومت په رسمیت نه پېژني او خپلې اړیکې له دې ډلې سره د تخنیکي او بشري همکاریو په چوکاټ کې پر مخ وړي.
