د ملګرو ملتونو سرمنشي انتونیو ګوټرېش د ماشومانو د خوندیتوب لپاره د مصنوعي ځیرکتیا په برخه کې د نړیوال اقدام غوښتنه کړې او خبرداری یې ورکړی چې دا ټکنالوژي د حکومتونو د قانون جوړونې او څار له وړتیا څخه په ډېرې چټکۍ سره پرمختګ کوي، هغه وضعیت چې د ده په وینا ماشومان له جدي خطرونو سره مخ کوي.
ګوټرېش د دوشنبې په ورځ، د سرطان په ۱۵مه، په ژنیو کې د «مصنوعي ځیرکتیا د نړیوالې حکومتولۍ» د لومړۍ غونډې د پرانیستې پر مهال وویل، هغه مصنوعي ځیرکتیايي سیستمونه چې د ماشومانو لپاره جوړېږي، باید تر کارونې مخکې د خپلواکو ادارو له لوري د خوندیتوب او اغېزو له پلوه په بشپړه توګه وارزول شي.
هغه مصنوعي ځیرکتیا له درملو او لوبو سره پرتله کړه او ویې ویل: «موږ هېڅ درمل ماشومانو ته تر هغې نه ورکوو چې خوندي والی یې ثابت نه شي او هره لوبه د بازار ته له وړاندې کېدو مخکې ازمویل کېږي. خو مصنوعي ځیرکتیا د دې له ارزونې مخکې چې پر ماشومانو به څه اغېز ولري، د هغوی زدهکړو، ملګرتیاوو او شخصي ژوند ته ننوتې ده.»
د ملګرو ملتونو سرمنشي د ماشومانو د خوندي کولو لپاره درې اساسي وړاندیزونه هم مطرح کړل: د ماشومانو لپاره د ځانګړو خوندیتوب ازموینو ترسره کول د خپلواک څار لاندې، د مصنوعي ځیرکتیا له لارې د ماشومانو د جنسي ناوړه ګټې اخیستنې د محتوا پر ضد بېپرې مبارزه، او داسې میکانیزمونه رامنځته کول چې له خطر سره مخ ماشومان د واقعي بشري ملاتړ له شبکو سره ونښلوي.
ګوټرېش ټینګار وکړ: «کله چې یو ماشوم زیان ویني، هېڅکله باید ځواب دا نه وي چې دا کار الگوریتم کړی دی.» هغه له دولتونو وغوښتل چې د مصنوعي ځیرکتیا د پراختیا او کارونې لپاره همغږي او نړیوال مقررات رامنځته کړي.
دا څرګندونې په داسې وخت کې کېږي چې په نړۍ کې د مصنوعي ځیرکتیا له لارې د ماشومانو د غولولو، ځانزیان ته د هڅولو، د جنسي ناوړه ګټې اخیستنې د محتوا د تولید او نورو ډیجیټلي ګواښونو په اړه اندېښنې ورځ تر بلې زیاتېږي. کارپوهان باور لري چې د مصنوعي ځیرکتیا له چټک پرمختګ سره د قوانینو همغږي کول به د راتلونکو کلونو له مهمو نړیوالو ننګونو څخه وي.
