د پاکستان امنیتي سرچینې وایي، د خیبر په سرحدي سیمه کې د طالبانو د سرحدي ځواکونو او پاکستاني ځواکونو ترمنځ په تازه نښته کې درې پاکستاني سرحدي سرتېري ټپیان شوي چې د یوه روغتیايي وضعیت نازک ښودل شوی دی. دا پېښه په داسې حال کې رامنځته شوې چې په وروستیو اوونیو کې د دواړو لورو ترمنځ سرحدي ترینګلتیا زیاته شوې ده.
د پاکستاني امنیتي سرچینو په وینا، نښته د سپکو او درنو وسلو په کارولو سره شوې او له لنډ وخت وروسته پای ته رسېدلې ده. ټپیان شوي ځواکونه د درملنې لپاره روغتیايي مرکز ته لېږدول شوي دي.
همدغو سرچینو ادعا کړې چې د طالبانو سرحدي ځواکونو پرته له کوم مخکیني تحریک څخه د خیبر د تبایي سیمې پر پاکستاني پوستو ډزې کړې دي. طالبانو تر اوسه د دې ادعا په اړه رسمي غبرګون نه دی ښودلی او د پېښې خپل روایت یې هم نه دی خپور کړی.
دا پېښه یوازې څو ورځې وروسته له هغه شوې چې د دواړو لورو ترمنځ پوځي تاوتریخوالی زیات شوی و. د سرطان په اتمه، پاکستان د پکتیا، پکتیکا او کونړ پر ځینو سیمو هوايي بریدونه وکړل. د ملګرو ملتونو د شمېرو له مخې، په دغو بریدونو کې لږ تر لږه ۲۸ ملکي وګړي وژل شوي وو، خو طالبانو د قربانیانو شمېر تر دې لوړ ښودلی او بریدونه یې «تېری» بللي وو.
له هغې وروسته طالبانو هم د څو بېپیلوټه الوتکو په وسیله د پاکستان پر لور بریدونه وکړل، خو د پاکستان پوځ ادعا وکړه چې دغه «ابتدایي ډرونونه» یې شنډ او نسکور کړي دي.
د وروستیو پېښو دوام ښيي چې د کابل او اسلامآباد ترمنځ د رسمي اړیکو سربېره، د ډیورنډ کرښې په اوږدو کې امنیتي وضعیت لا هم نازک دی. که ورته نښتې دوام ومومي، د سرحدي بېثباتۍ د پراخېدو او د دواړو لورو د اړیکو د لا پېچلي کېدو احتمال به هم زیات شي.
