د ملګرو ملتونو د ښځو ادارې د «ښځې په سیاست ۲۰۲۶» راپور کې ویلي چې افغانستان لا هم د هغو هېوادونو له ډلې دی چې د ښځو د سیاسي حضور په اړه یې د وړاندې کولو وړ رسمي معلومات نه شته.
دغه راپور، چې د نړۍ د ۱۹۰ هېوادونو په سیاسي جوړښتونو کې د ښځو ګډون ارزوي، افغانستان د ګینې او میانمار ترڅنګ د «استثنايي وضعیت یا د معلوماتو د نشتوالي» په برخه کې ځای کړی دی.
د راپور له مخې، په نړۍ کې په پارلمانونو کې د ښځو د حضور منځنۍ کچه ۲۷.۴ سلنه ده، خو افغانستان د فعال پارلمان او رسمي معلوماتو د نشتوالي له امله د ښځو د پارلماني استازیتوب په نړیواله درجهبندۍ کې نه دی شامل شوی.
د کابینې په برخه کې هم افغانستان د هېوادونو له لېست څخه ایستل شوی او د شمالي کوریا او میانمار ترڅنګ د هغه هېواد په توګه یاد شوی چې د ښځو د کابینې د غړیتوب په اړه یې د لاسرسي وړ معلومات نه شته.
په راپور کې ویل شوي چې د طالبانو له بیا واکمنېدو مخکې، په ۲۰۲۱ کال کې افغان ښځو د ولسي جرګې له ۲۵۰ څوکیو څخه ۶۸ څوکۍ، چې شاوخوا ۲۷ سلنه جوړېدې، په واک کې لرلې. خو د طالبانو له واکمنېدو وروسته، ښځې د سیاسي پرېکړو له ټولو رسمي جوړښتونو څخه لرې کړل شوې.
راپور همدارنګه ښيي چې په نړۍ کې یوازې ۱۰.۶ سلنه هېوادونه ښځینه د دولت مشره او ۱۰.۹ سلنه هېوادونه ښځینه لومړۍ وزیره لري.
د ښځو د حقونو کارپوهان وایي، له سیاسي واک څخه د ښځو بشپړ ایستل افغانستان د نړۍ له هغو محدودو هېوادونو څخه ګرځولی چې ښځې پکې د پرېکړو او رسمي سیاسي استازیتوب هېڅ ونډه نه لري؛ داسې وضعیت چې د ښځو د سیاسي مشارکت له نړیوال بهیر سره د افغانستان واټن نور هم زیات کړی دی.
