د اوبو او چاپېریال کارپوهانو په ایران کې د اوبو د بحران د لا ژورېدو خبرداری ورکړی او ویلي یې دي چې د هېواد د بیا نوي کېدونکو اوبو سرچینې د تېرو څو لسیزو په ترڅ کې له شاوخوا ۱۳۰ میلیارده مکعب مترو څخه تر ۱۰۰ میلیارده مکعب مترو هم کمې شوې دي.
د راپورونو له مخې، ایران د فالکنمارک د شاخص له مخې د اوبو د فشار په ساحه کې قرار لري. دغه شاخص د هر وګړي لپاره د بیا نوي کېدونکو اوبو کلنۍ اندازه ارزوي او د اوبو د فشار کچه ښيي.
د اوبو او چاپېریال کارپوه امیرحسین صادقزاده ویلي، د اورښتونو دوامداره کمښت، د هوا د تودوخې زیاتوالی، له ځمکنیو اوبو څخه بېرویې ګټه اخیستنه او د اوبو د عرضې او تقاضا ترمنځ نابرابري د دې لامل شوې چې د اوبو بحران لا پسې ژور شي.
د هغه په وینا، که اوسنی وضعیت همداسې دوام وکړي، نو په راتلونکو لسو تر شلو کلونو کې به د اوبو بحران لا پراخ او جدي شي.
صادقزاده زیاته کړې چې د خراسان رضوي، جنوبي خراسان، سمنان، یزد، کرمان، سیستان او بلوچستان، اصفهان، قم او قزوین ولایتونه د نورو سیمو په پرتله له سختو اوبو کمښت سره ډېر مخ دي.
نوموړي د اوبو د تصفیې، بیا کارونې او د اوبو د مصرف د مدیریت لپاره د کورنیو ټکنالوژیو پراختیا د دې بحران د اغېزو د کمولو له مهمو لارو څخه یاده کړې ده.
