د ایران او افغانستان د سوداګرۍ خونې رئیس محمود سیادت ویلي، ایران د خپل جغرافیایي موقعیت، صنعتي بنسټونو او تخنیکي وړتیاوو له امله کولای شي د افغانستان د کانونو د پراختیا له مهمو شریکانو څخه شي.
هغه د یکشنبې په ورځ فارس خبري اژانس ته ویلي چې افغانستان د نړۍ له سترو معدني زېرمو څخه برخمن دی او ایران کولای شي د کانونو د سپړنې، جیولوژیکي نقشو جوړولو، برمې وهلو، استخراج، تجهیزاتو برابرولو او مسلکي روزنې په برخو کې له افغانستان سره د لوېدیځو ټکنالوژیو په پرتله په ټیټه بیه همکاري وکړي.
د سیادت په وینا، د دواړو هېوادونو د همکارۍ طرحه پر دوو اساسي محورونو ولاړه ده؛ لومړی، افغانستان ته د تخنیکي، انجینري او کاناړوندو تجهیزاتو صادرول، او دویم، د معدني موادو د استخراج او پروسس لپاره د ګډ اقتصادي ځنځیر جوړول.
هغه وړاندیز کړی چې معدني مواد دې په افغانستان کې استخراج شي او د پروسس یوه برخه دې په ایران، په ځانګړي ډول په سرحدي ازادو سیمو کې ترسره شي. د هغه په باور، دا کار به هم د افغانستان د خامو موادو د صادراتو کچه راکمه کړي او عواید به یې زیات کړي، او هم به د ایران د کانونو د صنعت اړتیاوې پوره کړي.
سیادت همدارنګه ویلي چې د چابهار او بندرعباس بندرونو کارول د افغانستان د معدني محصولاتو د صادراتو لپاره د دواړو هېوادونو په ګټه دي او ټینګار یې کړی چې ایران باید د افغانستان په کانونو کې د نورو هېوادونو حضور ته یوازې ننداره ونه کړي.
دا څرګندونې داسې مهال کېږي چې فارس خبري اژانس تر دې وړاندې راپور ورکړی و چې ایران غواړي د افغانستان د اوسپنې په کانونو کې شاوخوا پنځه میلیارده ډالره پانګونه وکړي.
افغانستان د مسو، اوسپنې، لیتیم، سرو زرو او نادرو فلزاتو د پام وړ زېرمې لري، خو ناامني، د بنسټیزو اسانتیاوو کمښت، د انرژۍ ستونزې او د پانګونې محدودیتونه لا هم د دې سکټور د پراختیا ستر خنډونه ګڼل کېږي.
