د ایران د بشري حقونو سازمان ویلي چې د ایران د زابل په زندان کې د دوو بندیانو د اعدام حکم عملي شوی، چې په هغوی کې یو افغان وګړی هم شامل و.
د دغه سازمان د راپور له مخې، اعدام شوی افغان همایون نورزی نومېده، ۷۰ کاله عمر یې درلود او د افغانستان د کندوز ولایت اوسېدونکی و.
راپور وایي، همایون نورزی شاوخوا یو کال او اووه میاشتې مخکې د میلک په سرحدي دروازه کې د مخدره موادو د لېږد په تور نیول شوی و او وروسته د ایران د اسلامي جمهوریت د انقلاب محکمې د اعدام سزا پرې اورولې وه.
د سازمان په وینا، له نوموړي سره په یو وخت حسین یوسفزی، چې یو بلوڅ زنداني و، هم د مخدره موادو اړوندو جرمونو په تور له ۲۷ کلن بند وروسته د زابل په زندان کې اعدام شوی دی.
د ایران د بشري حقونو سازمان ټینګار کړی چې ایراني چارواکو او دولتي رسنیو تر اوسه د دغو دوو اعدامونو په اړه رسمي اعلان یا تأیید نه دی کړی.
د بشري حقونو بنسټونه وایي، په افغانستان کې د طالبانو له بیا واکمنېدو وروسته په ایران کې د افغان وګړو د اعدامونو شمېر زیات شوی دی. دغو بنسټونو د مخدره موادو اړوندو دوسیو کې د اعدامونو د چټک زیاتوالي په اړه هم اندېښنه څرګنده کړې ده.
د ایران د بشري حقونو سازمان د شمېرو له مخې، په ۲۰۲۵ کال کې لږ تر لږه ۷۹۵ کسان په ایران کې د مخدره موادو اړوندو جرمونو په تور اعدام شوي، چې دا شمېر د تېر کال په پرتله ۵۷ سلنه زیاتوالی ښيي.
