توبیاس الوود، د بریتانیا د پارلمان د دفاعي کمېټې پخواني رئیس، د طالبانو له ادارې سره د تعامل غوښتنه کړې او خبرداری یې ورکړی چې د افغانستان دوامداره انزوا به د داعش په څېر ډلو او د چین د نفوذ د پراختیا په ګټه تمامه شي.
الوود په هغې مقاله کې چې د ټیلیګراف ورځپاڼې خپره کړې، لیکلي چې د افغانستان په اړه د لوېدیځ اوسنۍ تګلاره د بریتانیا ملي ګټې نه تأمینوي او باید د فعالې ډیپلوماسۍ ځای ونیسي.
هغه د افغانستان د ښځو او نجونو د وضعیت یادونه کړې او ویلي یې دي چې له لرې څخه د طالبانو غندل او لفظي غبرګونونه تر اوسه د دې ډلې په سیاستونو کې کوم بدلون نه دی راوستی.
د نوموړي په باور، مستقیمې خبرې او تعامل کولی شي د افغانستان د امنیتي او سیاسي ننګونو د مدیریت لپاره اغېزمنه لاره وي.
توبیاس الوود تر دې وړاندې هم په ۲۰۲۳ کال کې د افغانستان په اړه د خپلو څرګندونو له امله د رسنیو د پام وړ ګرځېدلی و. هغه هغه مهال ویلي وو چې افغانستان د پخوا په پرتله له ډېر ثبات څخه برخمن شوی دی.
دغه څرګندونې له پراخو غبرګونونو سره مخ شوې او وروسته یې د بریتانیا د پارلمان د دفاعي کمېټې د رئیس له دندې استعفا ورکړه.
