د کابل، هرات او غزني ولایتونو یو شمېر اوسېدونکي وایي چې د طالبانو ځواکونه له محرم عزادارانو سره نامناسب او کله ناکله سخت چلند کوي او د مذهبي مراسمو د ازادې ترسره کېدو مخه نیسي.
د هغو پیغامونو، ویډیوګانو او غږیزو ثبتونو له مخې چې تلویزیون نیمروز ته رسېدلي، د طالبانو ځینو مامورانو په بېلابېلو سیمو کې د محرم بیرغونه ښکته کړي، د عزادارۍ تورې ټوکرۍ یې لرې کړې او ځینې مذهبي نښې یې راټولې کړې دي.
د کابل د دشت برچي سیمې اوسېدونکي وایي چې د طالبانو د امر بالمعروف او نهی عن المنکر مامورانو د شنبې په ورځ د دوکانونو، کورونو او د عزادارۍ له ځایونو څخه د محرم بیرغونه ټول کړي دي. د دوی په وینا، دغه اقدامات له فشار او سپکاوي ډک چلند سره مل وو.
په هرات ولایت کې د شیدایي سیمې د حاج قربان ښارګوټي اوسېدونکو هم ویلي چې د طالبانو مامورانو د چهارشنبې په ماښام هغوی اړ کړي چې د محرم بیرغونه ښکته کړي.
همدارنګه د غزني یو اوسېدونکي له یوې ویډیو سره ادعا کړې چې د طالبانو ځواکونو د شپې ګزمې پر مهال د عزادارۍ بیرغونه راښکته کړي او د محرم ځانګړې تورې ټوکرۍ یې شلولې دي.
دغه اوسېدونکي وایي چې سږ کال هم محدودیتونه دوام لري او د طالبانو د رسمي څرګندونو برعکس، د شیعه مذهبي مراسمو د ترسره کېدو فضا له پراخو محدودیتونو سره مخ ده.
په همدې حال کې، د افغانستان د شیعه علماوو شورا په وروستیو کې په یوه اعلامیه کې له طالبانو غوښتي وو چې د محرم د مراسمو امنیت په ټول هېواد کې تأمین کړي او د دغو مراسمو د ارام او بې خنډه ترسره کېدو زمینه برابره کړي.
تر دې وړاندې د طالبانو د کورنیو چارو وزیر سراجالدین حقاني هم د محرم په ورځو کې د خلکو د امنیت د ساتنې لپاره د لازمو تدابیرو پر نیولو ټینګار کړی و.
طالبانو تر اوسه د دغو راپورونو او د خلکو د ادعاوو په اړه رسمي غبرګون نه دی ښودلی.
تلویزیون نیمروز نه شي کولای د یادو ادعاوو ټول جزئیات په خپلواکه توګه تایید کړي.
