سرچینو د ژنیو ښار څخه د یو انځور په استولو سره افغانستان انټرنشنل ته ویلي چې د طالبانو دوه چارواکي د سویس په ژنیو ښار کې لیدل شوي او ټاکل شوې ده د ملګرو ملتونو له لوري د اوبو په اړه جوړېدونکې نړیواله غونډه کې ګډون وکړي.
د سرچینو په وینا، دغه کسان د طالبانو د بهرنیو چارو وزارت اړوند چارواکي دي، خو د هغوی هویت تر اوسه په رسمي ډول نه دی اعلان شوی.
ټاکل شوې ده چې ملګري ملتونه د ۲۰۲۶ کال د جون په ۲۲ او ۲۳ نېټه په ژنیو کې د «پولو هاخوا اوبو په برخه کې د همکاریزو هوکړو او ترتیباتو د پراختیا، بیاکتنې او بیا رغونې» تر عنوان لاندې نړیوال ورکشاپ جوړ کړي.
د دې غونډې اصلي موخه د هغو هېوادونو ترمنځ د همکاریو پیاوړتیا بلل شوې چې ګډې اوبه، سیندونه، جهیلونه او د ځمکې لاندې اوبیزې سرچینې لري.
د غونډې د تنظیموونکو د معلوماتو له مخې، په دې پروګرام کې به د اوبو اړوند موجودو هوکړو د نوي کولو، د همکاریو د نوو چوکاټونو د رامنځته کولو، د اوبو پر سر د احتمالي شخړو د مخنیوي او د اوبو د ډیپلوماسۍ د بریالیو تجربو د شریکولو په اړه بحثونه وشي.
دا ډول غونډې معمولاً د حکومتونو د استازو، تخنیکي او حقوقي متخصصینو، نړیوالو سازمانونو او د اوبو د مدیریت اړوندو بنسټونو په ګډون ترسره کېږي.
تر اوسه د غونډې تنظیموونکو د ګډونوالو رسمي نوملړ نه دی خپور کړی. افغانستان انټرنشنل هم ویلي چې د افغانستان د احتمالي پلاوي د ګډون په اړه یې د غونډې له دارالانشا څخه معلومات غوښتي، خو لا یې ځواب نه دی ترلاسه کړی.
دغه ورکشاپ د ملګرو ملتونو د هغو هڅو برخه ګڼل کېږي چې هدف یې د اوبو د سرچینو د مدیریت په برخه کې د نړیوالو همکاریو پیاوړتیا او د ګډو اوبو پر سر د احتمالي شخړو کمول دي.
د نیمروز له نظره، که د طالبانو استازي په رسمي ډول په دې غونډه کې ګډون وکړي، دا به د اوبو او چاپېریال په څېر تخنیکي او سیمهییزو موضوعاتو کې د افغانستان د استازیتوب یو مهم پرمختګ وګڼل شي، خو تر رسمي تایید وړاندې باید دغه معلومات د احتیاط له مخې وڅېړل شي.
