د افغانستان رنګینکمان سازمان ویلي چې په هېواد کې پر ښځو، معترضینو او د الجيبيټيکيو ټولنې پر غړو فشارونه او محدودیتونه زیات شوي دي.
دغه سازمان په یوه اعلامیه کې ویلي چې په وروستیو ورځو کې لسګونه ښځې د پوښښ د مقرراتو د نقض په پلمه نیول شوې دي او د خلکو اعتراضونه هم د طالبانو له غبرګون سره مخ شوي دي.
د اعلامیې له مخې، یو شمېر اعتراضونه د زور او مستقیمو ډزو په کارولو سره ځپل شوي چې په پایله کې یې ځینې ملکي وګړي وژل شوي یا ټپیان شوي دي.
رنګینکمان سازمان همداراز بروکسل ته د طالبانو د استازو د بلنې په اړه د اروپایي ټولنې پر پرېکړې نیوکه کړې او د دې اقدام د سیاسي او بشري حقونو اړخونو په اړه یې اندېښنه څرګنده کړې ده.
په اعلامیه کې د الجيبيټيکيو ټولنې د غړو وضعیت «ډېر زیانمنونکی» بلل شوی دی.
دغه سازمان ادعا کوي چې ترانس ښځې، همجنسپاله، دوجنسپاله او د دې ټولنې نور غړي د نیولو، تاوتریخوالي، جبري ودونو، تبعیض او عدالت ته د لاسرسي له محدودیتونو سره مخ دي.
رنګینکمان سازمان له نړیوالې ټولنې او د بشري حقونو له نړیوالو بنسټونو غوښتي چې په افغانستان کې د بشري حقونو وضعیت له نږدې وڅاري او د طالبانو سره په سیاسي تعاملاتو کې د ښځو او اقلیتونو اړوند اندېښنې په پام کې ونیسي.
طالبانو تر اوسه د دغې اعلامیې په اړه رسمي غبرګون نه دی ښودلی.
د نیمروز له نظره، د بشري حقونو وضعیت لا هم د افغانستان له مهمو بحثونو څخه دی او د نړیوالو سازمانونو او مدني بنسټونو ارزونې په دې برخه کې د نړیوالو غبرګونونو پر څرنګوالي اغېز کولی شي.
