د طالبانو د حج او اوقافو وزیر نورمحمد ثاقب د سعودي عربستان د حج او عمرې له وزیر توفیق بن فوزان الربیعه سره په لیدنه کې د افغانستان د حج د سهمیې د زیاتولو غوښتنه کړې ده.
د طالبانو د حج او اوقافو وزارت د دوشنبې په ورځ، د جوزا په ۲۵مه، اعلان وکړ چې ثاقب د افغانستان د نفوس د زیاتوالي او د حج د غوښتونکو د لوړ شمېر په یادولو سره له سعودي چارواکو غوښتي چې په راتلونکو کلونو کې د افغان حاجیانو لپاره د لا ډېرو فرصتونو زمینه برابره کړي.
د نوموړي په وینا، هر کال له ۱۰۰ زرو څخه زیات افغانان د حج فریضې د ادا کولو لپاره نوملیکنه کوي، خو اوسنۍ سهمیه د دغې غوښتنې یوازې یوه برخه پوره کوي.
د سعودي عربستان د ټاکل شوې سهمیې له مخې، دا مهال هر کال ۳۰ زره افغان حاجیان د حج د مراسمو د ترسره کولو لپاره دغه هېواد ته استول کېږي.
نورمحمد ثاقب په دې لیدنه کې د حج د مراسمو د تنظیم او مدیریت په برخه کې د سعودي عربستان له خدماتو مننه کړې او دواړو لورو د دیني او فرهنګي همکاریو د پراختیا په اړه هم خبرې کړې دي.
د طالبانو د حج او اوقافو وزارت د خبرپاڼې له مخې، په دې غونډه کې د حاجیانو لپاره د خدماتو ښه کول، د اداري بهیرونو اسانتیا، د روزنیزو پروګرامونو د کیفیت لوړول او د حج د کاروانونو د لارښودانو د ظرفیت پیاوړتیا هم د بحث مهم موضوعات وو.
دغه وزارت د سږ کال د حج لګښت د هر افغان حاجي لپاره ۲۶۶ زره او ۴۰۰ افغانۍ ټاکلی و.
د وزارت د معلوماتو له مخې، د سږني حج د پروګرام ټول لګښتونه له اووه میلیارده او ۸۱۸ میلیونه افغانیو څخه زیات اټکل شوي چې نږدې ۱۱۹ میلیونه امریکایي ډالرو ته رسېږي.
د نیمروز له نظره، د حج د سهمیې زیاتوالی د زرګونو هغو افغانانو لپاره مهم دی چې هر کال د دې دیني فریضې د ادا کولو هیله لري، خو د محدودې سهمیې له امله د انتظار په اوږدو لېستونو کې پاتې کېږي.
