ځايي سرچینو تلویزیون نیمروز ته ویلي چې د طالبانو استخباراتو د غور ولایت د تیورې ولسوالۍ د زربید کلي او شاوخوا سیمو شاوخوا ۷۰ قومي مشران تر خبرو اترو وروسته نیولي دي.
د سرچینو په وینا، له دې پېښې څلور ورځې تېرې شوې، خو د نیول شویو کسانو کورنۍ لا هم د هغوی د ساتنې ځای او وضعیت په اړه معلومات نه لري.
سرچینو د دوشنبې په ورځ، د جوزا په ۲۵مه، ویلي چې طالبانو د «وشا» په نوم د غرنۍ بوټۍ د راټولولو پر سر د تېرې اوونۍ له شخړې وروسته د سیمې مشران د خبرو لپاره د غور مرکز فیروزکوه ته وربللي وو.
د سرچینو په خبره، یادو مشرانو د طالبانو بلنې ته مثبت ځواب ورکړ او فیروزکوه ته ولاړل، خو هلته له رسېدو وروسته ونیول شول او تر اوسه خپلو کورونو ته نه دي ستانه شوي.
د ورکړل شویو معلوماتو له مخې، د نیول کېدو له ورځې راهیسې د دغو کسانو او د هغوی د کورنیو ترمنځ هېڅ ډول اړیکه نه ده ټینګه شوې.
طالبانو تر اوسه د دغو ادعا شویو نیونو او یا هم د تیورې ولسوالۍ د وروستۍ شخړې په اړه رسمي څرګندونې نه دي کړې.
ځايي سرچینو تر دې وړاندې راپور ورکړی و چې د زربید په بازار کې د سیمې د اوسېدونکو او د هلمند ولایت د یو شمېر کسانو ترمنځ د «وشا» بوټي د راټولولو پر سر شخړه رامنځته شوې وه.
د سرچینو په وینا، یاد کسان د دې نادره بوټي د راټولولو لپاره سیمې ته تللي وو، خو ځايي اوسېدونکو پرې اعتراض کړی و.
سرچینې دا ادعا هم کوي چې طالبانو په دغه شخړه کې لاسوهنه کړې او د اعتراض کوونکو پر لور یې ډزې کړې دي چې له امله یې لږ تر لږه پنځه کسان ټپیان شوي دي.
«وشا» غرنی بوټی د سیمې د ګڼو کلیوالو کورنیو لپاره د عاید یوه مهمه سرچینه بلل کېږي او هر کال د راټولولو په موسم کې لسګونه اوسېدونکي غرنیو سیمو ته د دې بوټي د راټولولو لپاره ځي.
تلویزیون نیمروز نه شي کولای د دغو ادعاوو ټول جزئیات په خپلواکه توګه تأیید کړي.
