د افغانستان لپاره د چین ځانګړي استازي یو شیاویونګ، قطر ته د خپل سفر پر مهال د قطر د بهرنیو چارو وزارت له سلاکار وزیر محمد بن عبدالعزیز بن صالح الخلیفي سره لیدلي او د افغانستان د وروستیو تحولاتو په اړه یې خبرې کړې دي.
د قطر د بهرنیو چارو وزارت د خبرپاڼې له مخې، دغه لیدنه د افغانستان د امنیت او ثبات د پیاوړتیا لپاره د ګډو نړیوالو هڅو پر پراخولو متمرکزه وه.
په دې غونډه کې قطري مقام ټینګار کړی چې دوحه د شخړو د پای ته رسولو او په سیمه او نړۍ کې د سولې او ثبات د پیاوړتیا لپاره له سولهییزو حللارو ملاتړ کوي.
قطر په وروستیو کلونو کې د افغانستان په قضیه کې فعاله ونډه لرلې او د افغانستان اړوند ګڼو مذاکراتو او ډیپلوماتیکو غونډو کوربه پاتې شوی دی.
هممهاله، چین هم هڅه کړې چې په افغانستان او سیمه کې خپل سیاسي او اقتصادي نفوذ پراخ کړي؛ په ځانګړي ډول د سیمهییز امنیت، پانګونې او د بېثباتۍ د مخنیوي په برخو کې.
شنونکي وایي، د چین او قطر په څېر هېوادونو ترمنځ د ډیپلوماتیکو سلا مشورو دوام ښيي چې افغانستان لا هم د سیمهییزو معادلو یو مهم محور پاتې دی.
د کارپوهانو په باور، د افغانستان د بېثباتۍ، امنیتي ګواښونو او اقتصادي وضعیت په اړه اندېښنو د سیمې هېوادونه لا ډېرو همکاریو او خبرو اترو ته اړ کړي دي.
