ملګرو ملتونو، د یونیسف د تازه راپور په حواله، ویلي چې افغانستان دا مهال د نړۍ له هغو هېوادونو څخه دی چې د ښځو د سواد کچه پکې تر ټولو ټیټه ده.
د ملګرو ملتونو د سرمنشي ویاند استیفان دوجاریک ویلي چې د طالبانو له لوري د نجونو پر زده کړو او د ښځو پر کار د محدودیتونو دوام کولی شي افغانستان تر ۲۰۳۰ کال پورې شاوخوا ۲۰ زره ښځینه ښوونکې او ۵۴۰۰ ښځینه روغتیايي کارکوونکې له لاسه ورکړي.
د هغه په وینا، دا محدودیتونه نه یوازې د ښځو بنسټیز حقونه اغېزمنوي، بلکې د هېواد د تعلیم، روغتیا او اقتصادي راتلونکي لپاره هم ژور زیانونه لري.
یونیسف اټکل کړی چې دا پالیسۍ اوس هم هر کال افغانستان ته شاوخوا ۸۴ میلیون ډالره اقتصادي زیان رسوي.
راپور زیاتوي چې دا مهال شاوخوا یو میلیون نجونې له زده کړو محرومې دي، او که وضعیت همداسې دوام وکړي، تر ۲۰۳۰ پورې به له دوو میلیونو ډېرې نجونې د تعلیم له حقه بېبرخې شي.
دا په داسې حال کې ده چې طالبانو واک ته له رسېدو وروسته پر ښځو او نجونو پراخ محدودیتونه لګولي، او د تعلیم، کار او ټولنیز حضور په ګډون یې ګڼ اساسي حقونه محدود کړي دي.
