د بدخشان ولایت د شکي ولسوالۍ ځايي سرچینې وایي چې د سرو زرو د کان د استخراج پر سر د ځایي اوسېدونکو او طالبانو اړوندو کسانو ترمنځ په نښته کې لږ تر لږه یو کس وژل شوی او یو شمېر نور ټپیان شوي دي.
درې باخبره سرچینو ویلي چې دغه نښته د شنبې په ورځ د ثور په ۱۹مه د سیمې اوسېدونکو او د قومندان فتاح اړوندو کسانو ترمنځ رامنځته شوې ده.
د سرچینو په وینا، قومندان فتاح چې د زابل د طالبانو د مرستیال والي جمعهخان فاتح ورور بلل کېږي، له سلګونو کسانو سره سیمې ته تللی و څو یوه پراخه معدني ساحه تر خپل کنټرول لاندې راولي او وویشي.
خو د سیمې اوسېدونکو د شنو ساحو او څرځایونو له پراخ تخریب سره مخالفت کړی او غوښتنه یې کړې چې لومړی دې د سرو زرو د شتون د ارزونې لپاره محدود استخراج ترسره شي.
سرچینې وایي، خبرې اترې وروسته له هغې تاوتریخوالي ته واوښتې چې د طالبانو اړوندو کسانو ډزې وکړې.
د راپورونو له مخې، په دې نښته کې لږ تر لږه یو کس وژل شوی او شاوخوا ۱۵ نور ټپیان شوي دي.
همداراز ویل شوي چې طالبانو لږ تر لږه ۱۵ معترضان نیولي او د سیمې کلي یې تر کلکې محاصرې او کنټرول لاندې راوستي دي.
طالب چارواکو تر اوسه د دغې پېښې په اړه رسمي څرګندونې نه دي کړې.
دغه نښته یو ځل بیا د افغانستان په شمالختیځ کې د کانونو او طبیعي سرچینو پر سر شته ترینګلتیاوې برجسته کوي؛ هغه سیمه چې په وروستیو کلونو کې د غیرشفاف استخراج، د چاپېریال تخریب او د زور له لارې د کانونو د کنټرول په اړه اندېښنې زیاتې شوې دي.
کارپوهان وایي، د کانونو په مدیریت کې د روښانه چوکاټ نشتوالی او د ځایي ټولنو محدود ګډون کولای شي ټولنیزې شخړې او د طبیعي سرچینو د مدیریت پر وړاندې بېباوري نوره هم زیاته کړي.
