محمد یعقوب مجاهد، د طالبانو د دفاع وزیر، اعلان کړی چې د دې ډلې اداره په افغانستان کې د یوه مسلکي دفاعي جوړښت د رامنځته کولو لپاره پلان جوړوي.
هغه د لوړپوړو امنیتي چارواکو په نړیواله غونډه کې وویل چې د دې پروګرام موخه د افغانستان د امنیت تأمین او د سیمې له ثبات سره مرسته ده.
د طالبانو د دفاع وزیر په وینا، یو مسلکي دفاعي سیستم کولی شي د دوامدار امنیت زمینه برابره کړي او د سیمهییزو همکاریو په پیاوړتیا کې مهم رول ولوبوي.
یعقوب مجاهد ټینګار وکړ چې امنیت او اقتصاد له یو بل سره مستقیم تړاو لري او پرته له امنیته اقتصادي او سوداګریز پرمختګ ناشونی دی.
هغه زیاته کړه چې د سوداګرۍ پراختیا، اقتصادي همکاري او د سیمهییز اتصال پراخول کولی شي په افغانستان او سیمه کې د دوامدار ثبات لامل شي.
د طالبانو د دفاع وزیر وویل چې کابل له هر هغه نوښت څخه ملاتړ کوي چې د سیمې هېوادونه یو بل ته نږدې کړي، همکارۍ زیاتې کړي او ګډې ګټې خوندي کړي.
هغه افغانستان د سوداګرۍ، ترانزیټ او پانګونې په برخو کې د پراخو ظرفیتونو لرونکی هېواد وباله او د سیمې د هېوادونو ترمنځ یې د اقتصادي همکاریو د پراختیا غوښتنه وکړه.
د یعقوب مجاهد څرګندونې په داسې حال کې مطرح کېږي چې طالبانو په وروستیو کلونو کې څو ځله د نویو امنیتي او نظامي بنسټونو د جوړولو خبره کړې ده.
خو په ورته وخت کې، یو شمېر نړیوال بنسټونه او د سیمې هېوادونه لا هم د افغانستان د امنیتي وضعیت، د افراطي ډلو د فعالیتونو او د پولې هاخوا امنیتي ګواښونو په اړه اندېښنې څرګندوي.
