د امریکا ولسمشر ډونالډ ټرمپ له فاکس نیوز شبکې سره په خبرو کې ویلي چې د وینزویلا د امریکا د ۵۱م ایالت د جوړېدو موضوع په جدي ډول ارزوي.
ټرمپ د وینزویلا د نفتو زېرمو ته په اشارې سره ویلي چې دغه هېواد د انرژۍ سترې سرچینې لري او زیاته کړې یې ده: «وینزویلا له ټرمپ سره مینه لري.»
د امریکا ولسمشر تر دې وړاندې هم د متحده ایالاتو د قلمرو د پراخېدو او د کاناډا او ګرینلنډ د احتمالي الحاق په اړه ورته څرګندونې کړې وې.
ټرمپ همداراز د جنورۍ په درېیمه د نیکولاس مادورو د نیول کېدو او امریکا ته د هغه د لېږد یادونه وکړه؛ هغه ځای چې نوموړی د مخدره موادو او وسلو اړوند تورونو سره مخ شوی دی.
د امریکا د قوانینو له مخې، د یوه هېواد د نوي ایالت په توګه د منلو لپاره په هغه هېواد کې ټولپوښتنې او همداراز د امریکا د کانګرس تایید ته اړتیا ده.
د ټرمپ دغو تازه څرګندونو په سیاسي او رسنیز ډګر کې پراخ غبرګونونه راپارولي او یو ځل بیا یې د هغه د بهرني سیاست او احتمالي پراختیا غوښتونکي لیدلوري په اړه بحثونه تاوده کړي دي.
کارپوهان وایي، که څه هم د وینزویلا د الحاق موضوع تر ډېره سیاسي او تبلیغاتي بڼه لري، خو مطرح کېدل یې ښایي په لاتینې امریکا کې ترینګلتیاوې زیاتې کړي؛ په ځانګړي ډول اوس چې د واشنګټن اړیکې له ځینو سیمهییزو حکومتونو سره لا هم پېچلې او ترینګلې پاتې دي.
